हेटौंडा / बागमतीमा प्रदेश सभाको वैठक लामो समय देखि बस्न सकेको छैन । गत साउन ८ गते देखि चल्न सकेको छैन। ८ गते प्रदेशसभा सचिवालयको छैटौं अधिवेशन अन्त्य भए पनि अहिलेसम्म संसद बैठक बस्न सकेको छैन । सत्तारुढ दल नेकपा भित्रको आन्तरिक विवादको प्रभाव प्रदेश तहमा समेत देखापरेको हो ।
बागमती प्रदेश सभाको छैटौं अधिवेशन अन्त्य भए पनि अहिलेसम्म संसद् बैठक बस्न सकेको छैन । संसद चल्ने वित्तिकै नेकपाको किचलो संसदमा प्रवेश गर्ने डरले बागमती प्रदेशका मुख्यमन्त्री डोरमणि पौडेलले संसदमा वैठक बोलाउन नसकेका नेकपाका एक सांसदले बताए । नेकपाको किचलो संसदमा बहस मात्रै नभई सरकारलाई नै अविश्वासको प्रस्ताव सम्म आउन सक्ने भन्दै मन्त्रिपरिषद् वैठकबाट प्रदेश प्रमुखलाई अधिवेशन आह्वानको घोषणा गर्न सकेको छैन । बागमती प्रदेशका एक मन्त्रीका अनुसार आन्तरिक विवाद कायमै रहेका कारण मुख्यमन्त्रीलाई आफ्नै पार्टीभित्रबाट अविश्वासको प्रस्ताव आउने डरले तत्काल बैठक नडाकेको देखिन्छ ।
नेकपा फुटे बागमती सरकार ढल्ने निश्चित
संसद भंग भए सँगै नेपाल कम्युनिष्ट पार्टी (नेकपा) विभाजन हुँदा प्रदेश सरकारको अंकगणित सुरु भईसकेको छ । नेकपा फुटेमा बागमती प्रदेश सरकार ढल्ने निश्चित देखिएको छ ।
संविधानको धारा १ सय ८८ को उपधारा २ मा मुख्यमन्त्रीले प्रतिनिधित्व गर्ने दल विभाजन भएमा वा प्रदेश सरकारमा सहभागी दलले समर्थन फिर्ता लिएमा ३० दिनभित्र विश्वासका मतका लागि प्रदेशसभा समक्ष प्रस्ताव राख्नुपर्ने व्यवस्था छ। मुख्यमन्त्रीको प्रस्ताव बहुमतले पारित हुन नसकेमा आफ्नो पदबाट मुक्त हुने उपधारा ३ मा रहेको छ । यस्तै धारा १ सय ८८ को उपधारा ४ अनुसार एक चौथाइ सांसदले अविश्वासको प्रस्ताव पनि पेश गर्न सक्ने व्यवस्था छ । यसकारण पनि नेकपा विभाजन भए बागमती प्रदेश सरकार ढल्ने निश्चित देखिएको हो ।
डोरमणिको पक्षमा ३३ मात्रै सांसद
ओली निकट सांसदहरु बाहेक बागमती प्रदेश सरकारमा मुख्यमन्त्री डोरमणि पौडेललाई कसैको साथ छैन । बागमती प्रदेशका मुख्यमन्त्री डोरमणि पौडेल आफ्नै संसदीय दल भित्र अल्पमतमा देखिएका छन् । सत्तारुढ नेकपा बागमती प्रदेशको संसदीय दलमा रहेका ८० जना नेकपा सासंद मध्ये मुख्यमन्त्री डोरमणि पौडेललाई अहिले ३३ सांसदको मात्रै साथ छ । केपी ओली निकट सांसदहरुले मात्रै मुख्यमन्त्री पौडेललाई समर्थन गरेका छन् ।
तर केपी ओली निकट मानिने पुर्वमन्त्री केशव स्थापित पनि मुख्यमन्त्री डोरमणि पौडेलको विपक्षमा रहेका छन् । प्रचण्ड र माधव नेपाल पक्षमा बागमती संसदीय दलमा ४७ जना रहेको छ । नेकपाका प्रभावशाली मानिने नेताहरु स्थायी कमिटी सदस्य अष्टलक्ष्मी शाक्य, केन्द्रीय सदस्यहरु राजेन्द्र पाण्डे, पशुपति चौलागाई लगायत मुख्यमन्त्री डोरमणि पौडेलको विपक्षमा रहेका छन् ।
यस्तै सरकारमै रहेका केन्द्रीय सदस्यहरु शालिकराम जम्मकट्टेल, अरुण नेपाल, युवराज दुलाल मुख्यमन्त्री पौडेल विरुद्धमै छन् । यस्तै सरकारमा रहेका केन्द्रीय सदस्यहरु कैलाश ढुंगेल, रामेश्वर फुँयाल भने मुख्यमन्त्री डोरमणि पौडेलको पक्षमा रहेका छन् ।
तत्कालिन एमालेमा संसदीय दलमा ओली पक्षका सांसदहरुको बहुमत भएपछि पौडेल मुख्यमन्त्री भएका थिए । पौडेल संग प्रतिष्पर्धामा थिईन एमाले नेतृ अष्टलक्ष्मी शाक्य । उनी माधव नेपाल पक्षबाट उम्मेद्वार बनेकी थिईन् । उक्त समयमा माओवादी संग सांगठनिक एकता नभएकोले एमाले भित्रै माधव नेपाल गुट र ओली गुटमा मात्रै प्रतिष्पर्धा भएको थियो । तर अहिले अवस्था फेरिएको छ ।
तत्कालिन एमाले भित्र रहेको ५८ मत मध्ये मुख्यमन्त्री डोरमणि पौडेललाई ३४ मत आएको थियो भने शाक्यलाई २४ मत आएको थियो । अहिले तत्कालिन माओवादी २२ मत र माधव नेपाल पक्षको २४ मत तथा मुख्यमन्त्री पौडेल संग चिडिएका केशव स्थापित सहित पौडेल इतरमा ४७ मत भएको हो ।
Discussion about this post