‘भ्रष्टाचारविरुद्ध सेवाग्राही सचेत हुनुपर्ने’

भरतपुर । जनताको प्रत्यक्ष सम्पर्क हुने कार्यालयमा हुन सक्ने भ्रष्टचार विरुद्धको अभियानलाई प्रभावकारी बनाउन सेवाग्राहीलाई सचेत पार्नुपर्नेमा सरोकारवालाले जोड दिएका छन् ।
भरतपुरमा आयोजित मालपोत कार्यलयको सेवा सम्बन्धमा भ्रष्टाचारविरुद्ध अभियान चितवनले गरेको छलफल कार्यक्रममा सहभागीले सरकारी सेवा झण्झटिलो भएको बताएका छन् । सरकारी सेवा प्रवाहको अवस्था विस्तारै सुध्रे पनि झण्झटयुक्त प्रक्रियाले गर्दा भ्रष्टाचार मौलाएको आंैल्याएका छन् ।
भ्रष्टाचारविरुद्ध अभियान चितवनका संयोजक भीमबहादुर श्रेष्ठले सरकारी क्षेत्रमा रहेको भ्रष्टाचार नियमित अनुगमन तथा प्रभावकारी कार्य सञ्चालन भएमात्रै सुधार हुनसक्ने बताउनुभयो ।
मालपोत कार्यालय चितवनका मालपोत अधिकृत गुरूदत्त सुवेदीले मालपोत कार्यालयले ७० भन्दा बढी कानुनहरु कार्यान्वयन गर्नुपर्ने, विकसित भएका प्रविधिहरुको प्रयोगका लागि कानुन अभाव भएकाले पनि कार्य सम्पादनमा समस्या आएको बताउनुभयो । उहाँले गुनासो र भ्रष्टाचार नियन्त्रणको शून्य सहनशीलताको नीति अवलम्बन गरिएको, राजस्व संकलनका लागि बैंक काउण्टरको व्यवस्था गर्न लागेकोले सेवा थप प्रभावकारी बन्ने जिकिर गर्नुभयो ।