रत्ननगर । नेकपाभित्र माधवकुमार नेपाल पक्षका युवाहरुले मदन भण्डारी फाउन्डेसनको विरुद्धमा रत्ननगरमा नाराबाजी गरेका छन् ।
मदन भण्डारी फाउन्डेसन रत्ननगर नगर कमिटी गठनको लागि आयोजना गरिएको कार्यक्रम स्थल नजिक युवाहरुले नाराबाजी गरेका हुन् । नगर कमिटी गठनका लागि रत्ननगरको हंस मनोरञ्जन केन्द्रमा कार्यक्रम आयोजना गरिएको थियो ।
केन्द्रको हलमा कार्यक्रम चलिरहँदा नेपाल पक्षका युवाहरुले होटलको गेटमा फाउन्डेसनको विरुद्ध नाराबाजी गरेका हुन् । युवाहरुले पार्टी एकता जिन्दावाद, फाउन्डेसन चाहिँदैन, गुटबन्दी गर्न पाइँदैन, मदन भण्डारी जिन्दावादलगायतका नारा लगाएका थिए ।
एकपक्षका युवाहरुले कार्यक्रमस्थल नजिक नाराबाजी गरेपछि दोहोरो भिडन्त हुन सक्ने भन्दै प्रहरीले सुरक्षा प्रदान गरेको थियो । कार्यक्रम स्थलमा प्रवेश गर्न खोजेका नेपाल पक्षका युवाहरुलाई प्रहरीले गेटमा रोकेको थियो ।
कार्यक्रम बिथोल्ने उद्देश्यका साथ कार्यक्रमस्थलमा पुगेका युवाहरुलाई प्रहरीले सुरक्षा दिएर भित्र पस्न दिएन । रत्ननगरका पुराना नेता चन्द्रकान्त न्यौपानेको अध्यक्षतामा १०१ सदस्यीय फाउन्डेसनको नगर कमिटी र अजित चौरेलको अध्यक्षतामा ५१ सदस्यीय मदन भण्डारी स्पोर्ट एकाडेमी गठन गरिएको छ ।
Discussion about this post