हेटौँडा । बागमती प्रदेशको राजधानी हेटौँडास्थित मदन भण्डारी स्वास्थ्य विज्ञान प्रतिष्ठानअन्तर्गतको हेटौँडा अस्पतालमा सोमबारबाट सघन उपचार कक्ष (आइसियू)सहितको भेन्टिलेटर सेवाको शुभारम्भ भएको छ । प्रदेशका मुख्यमन्त्री डोरमणि पौडेलले सोमबार आइसियूसहितको भेन्टिलेटर सेवा र उच्च उपचार कक्ष (एचडियू) सेवाको शुभारम्भ गरेका हुन् । हेटौँडा अस्पतालले ७ बेड आइसियू र १० बेड एचडियू सेवा सञ्चालनमा ल्याएको हो ।
मदन भण्डारी स्वास्थ्य विज्ञान प्रतिष्ठानका रजिष्ट्रार राजेश प्रसाईंले हेटौँडा अस्पतालले लामो समयबाट आइसियू सेवा सञ्चालन गर्ने तयारी गरे पनि सोमबार सफल भएको बताए । कोरोनाबाहेकका बिरामीहरुका लागिमात्रै आइसियूसहितको भेन्टिलेटरको सेवा उपलब्ध गराइने उनले बताए ।
हेटौँडा अस्पतालले विपन्न, गरिबहरुलाई लक्षित गरेर आइसियू बेड र एचडियू सेवाको शुल्क तोकेको छ । आइसियू बेडको प्रतिदिन १ हजार ५ सय रूपैयाँ, एचडियू बेडको शुल्क प्रतिदिन २ हजार रूपैयाँ र आइसियूसहितको भेन्टिलेटरको सेवाको शुल्क प्रतिदिन ४ हजार रूपैयाँ तोकिएको छ ।
Discussion about this post