चितवन । पूर्वी चितवनको खैरहनीमा रहेको उत्प्रेरणा बचत तथा ऋण सहकारी संस्थाले चेपाङ विद्यार्थीहरुलाई शैक्षिक तथा स्वास्थ्य सामग्री प्रदान गरेको छ । सो सहकारीले जिल्लाको कालिका नगरपालिका १० सिद्धिमा रहेको सिद्धि छात्रावासमा रहेका ४० जना विद्यार्थीलाई शैक्षिक र स्वास्थ्य सामग्री प्रदान गरेको हो ।
शैक्षिक सामाग्री अभावका कारण पठनपाठनमा समस्या भएको जानकारी पाएपछि विद्यार्थीहरुलाई आवश्यक शैक्षिक सामग्री प्रदान गरिएको सहकारीका अध्यक्ष कृष्णप्रसाद अधिकारीले जानकारी दिए ।
सामग्री लिएर सहकारीका पदाधिकारीहरु सिद्धि छात्रावास पुगेका थिए । सामाजिक अभियन्ता मुरलीप्रसाद गजुरेलको पहलमा कापीकलमलगायतको स्टेशनरीसहित मास्कसमेत वितरण गरिएको थियो ।
कापीकलमको अभावले विद्यार्थीहरुलाई पठनपाठनमा समस्या परिरहेको बेला सहयोग प्राप्त गरेपछि छात्रावासका सञ्चालक भरत चेपाङले खुसी व्यक्त गर्दै धन्यवाद दिए ।
संस्थाले सामाजिक उत्तरदायित्वअन्तर्गत सहयोग गरेको र आगामी दिनमा समेत अतिआवश्यक विपन्न तथा गरिब विद्यार्थीहरुलाई सहयोग गर्ने संस्थाका अध्यक्ष अधिकारीले प्रतिबद्धता जनाए ।
शैक्षिक सामाग्री हस्तान्तरणका लागि सहकारीका कार्यकारी अधिकृत उत्तम अधिकारी, सचिव नारायण महतो, कोषाध्यक्ष रामचन्द्र कोइराला, व्यवस्थापक सुजता खनाल सिद्धि पुगेका थिए ।
Discussion about this post