दीपज्योति सहकारीको साधारण सभा

चितवन । दीपकज्योति अभिवृद्धि बचत तथा ऋण सहकारी संस्था लिको १६औं वार्षिक साधारण सभा आइतबारबाट सुरू भएको छ । सहकारीको मुख्य कार्यालय र सेवा केन्द्रहरुमा मंसिर २६ गतेसम्म चरणबद्धरुपमा साधारण सभा एवं सेवा केन्द्र भेला गरी मंसिर २७ गते समापन गरिँदैछ ।

कोरोना संक्रमणका कारण उच्च सावधानी अपनाउँदै संस्थाले साधारण सभाको प्रक्रिया अघि बढाएको हो । सभाको शुभारम्भ गर्दै बागमती प्रदेश बचत तथा ऋण सहकारी संघका सञ्चालक एवं दीपज्योतिका सल्लाहकार संयोजक तेजेन्द्रबहादुर खड्काले यस संस्थाले अन्य संघसंस्थासँग समेत एकीकरण गर्दै जिल्लामा नमुना सहकारीका रुपमा अघि बढेको बताए ।

कार्यक्रममा संस्थाका अध्यक्ष भोला शिवाकोटीले दीपज्योतिले २०७५ मा गौरवमय साकोस र २०७६ मा अभिवृद्धि साकोससँग एकीकरण गरेको भन्दै अन्य सहकारीहरुसँग समेत एकीकरणको प्रक्रिया अगाडि बढाएको जानकारी दिए ।

सो अवसरमा यस संस्थासँग गत वर्ष एकीकरण भएको अभिवृद्धि साकोसका संस्थापक एवं संरक्षक डा. टीकानिधि ढकाल, संस्थाका उपाध्यक्ष तुल्सीराम आचार्य, सचिव नारायणप्रसाद उपाध्याय, शेयर सदस्य भगवती घिमिरे, यदुनाथ भट्टराईलगायतले बोलेका थिए ।

संस्थाका कार्यकारी प्रबन्धक उमाकान्त पौडेलले हाल संस्थामा ३ हजार ४१३ जना सदस्य रहेको, शेयर रकम पाँच करोड ७० लाख, कूल बचत ४० करोड, लगानी ३५ करोड रहेको जानकारी दिए । गत वर्ष संस्थाले १ करोड ३६ लाख रुपैयाँ नाफा गरेको सहकारीले चालु आर्थिक वर्षमा १ करोड ९३ लाख नाफा गर्ने लक्ष्य राखेको छ ।

सो संस्थाको यही मंसिर २७ गते धावन पार्टी प्यालेस जागृतिचोकमा समापन गर्ने कार्यक्रम छ ।