कोरोनाले सौराहाका दक्ष जनशक्ति पलायन

रत्ननगर । कोरोना महामारीका कारण सौराहाको पर्यटन तहसनहस भएको छ । व्यवसायीहरुको लगानी सङ्कटमा परेको छ । करिब ९ महिना सुनसान भएको सौराहामा कोरोनाको असर उत्तिकै छ । कोरोनाको असरमा व्यवसायीहरुले अधिकांश कर्मचारीले बिदा दिए । लामो समयसम्म सौराहा सुचारू नभएका कारण यहाँ कार्यरत कर्मचारीहरु पलायन भएका छन् ।
अहिले सौराहामा आन्तरिक पर्यटकको चहलपहल सुरू भएको छ, तर काम गर्ने कामदार छैनन् । होटलमा पर्यटक आइहाले भने पनि बिदामा रहेका कर्मचारी बोलाउनुपर्ने अवस्था रहेको छ । होटल सञ्चालकले पर्यटक आए भने केही दिनका लागिमात्रै भनेर कामदार बोलाउनुपर्ने अवस्था छ । ‘पर्यटकहरु कहिलेकाहीँ आउँछन्’, युनिक वाइल्ड रिसोर्टका सञ्चालक गुणराज थपलियाले भने, ‘मासिक तलब दिएर राखौँ भने पर्यटक आउने÷नआउने निश्चित छैन, त्यही भएर एक÷दुई दिनका लागि कामदार बोलाउने गरेका छौँ ।’ सौराहाका अधिकांश होटलहरुको अवस्था उस्तै छ । कोरोना महामारीका कारण गुणस्तरीय सेवा प्रदान गर्ने दक्ष जनशक्ति पलायन भएको क्षेत्रीय होटल संघ चितवनका महासचिवसमेत रहेका थपलियाले बताए ।
सौराहाको पर्यटन सामान्यतर्फ उन्मुख हुँदैछ, तर दक्ष जनशक्ति छैनन् । यसैलाई मध्यनजर गरी सौराहामा रोजगार उन्मुख सीपमूलक तालिम शुक्रबार उद्घाटन गरिएको छ । ब्रिलियन्ट मेनपावर ट्रेनिङ सेन्टर प्रालि, काठमाडौँले सञ्चालन गरेको दिगो रोजगारीका लागि पर्यटन क्षेत्रका तालिम परियोजनाले आयोजना गरेको सो तालिमको रत्ननगरका मेयर नारायण वनले उद्घाटन गरेका थिए । सो अवसरमा उनले दक्ष जनशक्तिको अभावका कारण पर्यटन क्षेत्रको सेवा गुणस्तरीय हुन नसकेको बताए । उनले पर्यटकीय क्षेत्रको मह¤व बढाउन पनि दक्ष जनशक्ति र स्तरीय सेवा आवश्यक रहेको उनको भनाइ छ ।
कार्यक्रममा क्षेत्रीय होटल संघ सौराहाका अध्यक्ष दीपक भट्टराईले कोरोना महामारीका कारण पर्यटन क्षेत्रमा दक्ष जनशक्ति पलायन भएको भन्दै परियोजनाले सञ्चालन गर्ने तालिमले आवश्यक जनशक्ति उत्पादन गर्ने विश्वास व्यक्त गरे । रत्ननगर नगरपालिका वडा नं–७ का वडाध्यक्ष राजन भट्टले तालिम लिएपछि प्रमाणपत्र सिरानीमा राखेर सुत्ने प्रवृत्तिका कारण सीपमूलक तालिममा गरिएको लगानी खेर गइरहेको बताए ।
रेवान सौराहाका अध्यक्ष दीपेन्द्र खतिवडाले परियोजनाबाट सञ्चालन भएको तालिमले उत्पादन गरेको जनशक्तिलाई सौराहामा रोजगारी दिने प्रतिबद्धता जनाए । सिटिइभिटीका निर्देशक तथा काठमाडौँ युनिभर्सिटीका प्रोफेसर डा. कुश्माकर भट्टले पर्यटन क्षेत्रमा दक्ष जनशक्ति उत्पादन गर्ने उद्देश्यले तालिम आयोजना गरिएको बताए ।
शुक्रबार उद्घाटन भएको तालिमको पहिलो चरणमा ४० जना र दोस्रो चरणमा ४० जनाको सहभागिता रहने परियोजनाका टिम लिडर करूणानिधि ज्ञवालीले जानकारी दिए । ६ महिने तालिममा होटल तथा पर्यटनसम्बन्धी कुक, वेटर, हाउसकिपिङ र फ्रन्ट अफिसको तालिम दिइने छ । निःशुल्करुपमा दिइने सो तालिममा सहभागीका लागि आवेदन खुल्ला गरिएको छ ।
तालिमको औपचारिक काम एक महिनापछि सुरू हुनेछ । परियोजना समन्वय समितिका संयोजक गुणराज थपलियाको अध्यक्षतामा उद्घाटन कार्यक्रम भएको थियो । युरोपियन युनियनको आर्थिक लगानी, ब्रिटिस काउन्सिलको व्यवस्थापन तथा दक्षता परियोजनाको सहयोगमा तालिम आयोजना गरिएको हो ।