युवा स्वरोजगार कार्यक्रम अर्थहीनः युवा सभासद

नवलपरासी । युवाहरुलाई उद्यमी बनाउन सरकारले सुरू गरेको युवा स्वरोजगार कार्यक्रमप्रति युवा सभासद्हरु नै अर्थहीन ठान्छन् । शनिबार नवलपरासीमा भएको कार्यक्रममा युवा सभासद् गगन थापाले यसलाई बेतुकको भने ।
त्यस्तै एमाओवादीको सभासद् टोपबहादुर रायमाझीले यो कार्यक्रमले धेरैको घरबास उठ्ने अवस्था आएको बताए । चौधरी उद्योग ग्राम नवलपरासीमा शनिबार भेला भएका युवा सभासद्हरु कांग्रेसका गगन थापा, एमालेका रविन्द्र अधिकारी र एकीकृत माओवादीका टोपबहादुर रायमाझीको यो विषयमा एकमत थियो ।
‘नेपालमा केही गरौं भन्ने युवाहरु नभएका होइनन् तर उनीहरुसँग पैसा छैन । पैसा बैंकले दिनुपर्ने हो । तर युवाहरुलाई बैंकले पत्याउँदैन’ सभासद् गगन थापाले भने । बैंकहरुले खतरा मोल्न नचाहने सजिलो क्षेत्रलाई मात्रै रोजेर लगानी गर्न खोजेको थापाले बताए । यो समस्या हटाउन नीतिगत सुधारको योजनामा रहेको उनले बताए ।
कृषिमा आधारित उद्योगहरुको विकासमा जोड नदिए नेपालमा आर्थिक उन्नति नहुने मत थियो । पहिले कृषिमा अनुदान दिन हुँदैन भन्ने दातृ निकायहरु अहिले आफैँ कृषिमा अनुदान दिन अग्रसर हुने गरेको थापाले बताए । कृषिमा सरकारी अनुदान बढाउन र प्रविधिमा विकासका लागि अनुसन्धान गर्न सरकार लाग्नुपर्ने थापाको सुझाव थियो ।
उद्योग व्यवसायमा फड्को मारेका निजी क्षेत्र पनि कृषिमा प्रवेश गरेमा यसको चाँडो विकास हुने एमालेका सभासद् रविन्द्र अधिकारीको भनाइ थियो । त्यस्तै कृषिका सहकारी बनाएर सरकारले समूह र सहकारीमा लगानी गरेमा राम्रो प्रतिफल आउने उनले बताए । नेपालमा अझैसम्म कृषिको उन्नतिका लागि भनेर राम्रा सहकारी गठन हुन नसकेको उनले बताए ।
एमाओवादीका सभासद् टोपबहादुर रायमाझीले सरकार मात्रै होइन, समुदाय पनि विकासमा संवेदनशील नभएको बताए । ‘हामी सरकारी अनुदान बढाउने कुरा गर्छौं तर समुदाय सरकारी अनुदान भनेको सित्तैमा पाएको दान मात्रै हो भन्ने बुझ्छ । त्यसमार्फत उन्नति गर्ने सोच्दैन’, माओवादी नेता रायमाझीले भने ।
सरकारले युवा स्वरोजगार कार्यक्रम ल्याएको तर त्यो सिर्जनशीलको लागि भन्दा ठगी खान पल्केकाहरुको पहुँचमा पुगेको रायमाझीको भनाइ थियो । माओवादी नेतृत्वको सरकारले नै यो कार्यक्रम ल्याएको थियो । यस्ता खुद्रे र फुटकर कार्यक्रमबाट आर्थिक उन्नति नहुने उनले बताए । विदेश गएर फर्केकालाई सरकारले सहयोग गरेर उद्यममा लगाउन उनले अपिल गरे ।
‘स्वरोजगारको पैसा जसरी पनि असुल उपर गर्ने सरकारी नीति छ । तर यस्ता ठगहरुले पनि पैसा लगेका छन् जसले केही काम गरेनन् अब त्यस्ताको फेरि घरबास उठ्ने भो । त्यसैले अनुदान मात्रै भनेर हुँदैन नियत पनि हेर्नुपर्छ’ रायमाझीले भने । कृषि विकासको एकदमै प्रारम्भिक चरणमा भएकाले धेरै सोचविचार गरेर पाइला चाल्नुपर्ने उनले बताए ।
उद्योगपति विनोद चौधरीले सरकारले चाहेमा आर्थिक उन्नति गर्न सक्ने विचार राखे । ‘दह्रो इच्छाशक्ति राखेमा सरकारले धेरै गर्न सक्छ । योजना सरकारले बनाउने हो । कसले के सहयोग गर्ने हो त्यो नीति पनि सरकारले नै तय गर्नुपर्छ’, उद्योगपति चौधरीको आग्रह थियो ।