‘स्थानीय निकायको निर्वाचन प्रक्रिया सुरू’

रत्ननगर । उपप्रधान तथा स्थानीय विकासमन्त्री प्रकाशमान सिंहले स्थानीय निकायको निर्वाचन प्रक्रिया सुरू भइसकेको बताउनुभएको छ ।
तत्काल स्थानीय निकायको निर्वाचन गर्न कानुनी अड्चन रहेको भन्दै उहाँले त्यसलाई हल गर्न स्थानीय स्वायत शासन ऐन २०५१ मा उल्लेख केही दफा संशोधन गरी स्थानीय निकायको निर्वाचन गरिने बताउनुभयो । उहाँले एक हप्ताभित्र दफा संशोधन गरेर निर्वाचन गर्ने वातावरण तयार पार्ने बताउनुभयो ।
सातौं गणतन्त्र दिवसको अवसरमा नेपाली कांग्रेस क्षेत्रीय समितिले २०४२ सालको सत्याग्रहमा योगदान गरेकाहरुलाई सम्मान गर्न बिहीबार रत्ननगरमा आयोजना गरेको कार्यक्रममा उहाँले स्थानीय स्वायत शासन ऐन २०५५ मा उल्लेख दफा संशोधन गर्ने कामलाई स्थानीय निकायको निर्वाचनको प्रक्रिया सुरू भएको बुझ्न पनि सबैलाई आग्रह गर्नुभयो । दफा संशोधन गरेर वातावरण सहज हुँदा बित्तिकै स्थानीय निकायको निर्वाचनको मिति तोकिने उहाँले स्पष्ट पार्नुभयो । ‘दफा संशोधन गरेर निर्वाचनको मिति तोकिने छ’, उहाँले भन्नुभयो, ‘अब स्थानीय निकायको निर्वाचन गर्न प्रक्रिया सुरू भइसक्यो ।
उहाँले संघीयताको कार्यान्वयनको लागि पनि स्थानीय निकायको निर्वाचन आवश्यक रहेको बताउनुभयो । उपप्रधानमन्त्री सिंहले संविधान निर्माण र स्थानीय निकायको निर्वाचन सँगसँगै गरिने बताउनुभयो । संविधान जारी गरेर निर्वाचन गर्दा ४ वर्षसम्म निर्वाचन हुन नसक्ने भएकाले सरकारले संविधान निर्वाचन र निर्वाचन सँगसँगै गर्न तयारी गरेको बताउनुभयो ।
‘संविधान बनाएर निर्वाचन गर्दा नयाँ कानुनअनुसार निर्वाचन गर्नुपर्ने भएकाले ४ वर्षसम्म निर्वाचन हुन सक्दैन’, उपप्रधामन्त्री सिंहले भन्नुभयो, ‘संविधान निर्माणसँगै निर्वाचन पनि गर्नुपर्छ भनेर प्रक्रिया सुरू गरिएको हो ।’
उपप्रधानमन्त्री सिंहले अबको ८ महिनाभित्रमा संविधान जारी हुने बताउनुभयो । उहाँले २०७१ माघ ८ गते लिखित लोकतान्त्रिक संविधान जारी गर्ने गरी काम गरिरहेको बताउनुभयो । तोकिएकै समयमै संविधान जारी गर्ने काममा शंका नगर्न आग्रह गर्दै उहाँले समयमै संविधान जारी गरी प्रतिबद्धता पूरा गर्न सरकार सचेत रहेको बताउनुभयो ।
उहाँले संविधानसभा बाहिर रहेको नेकपा–माओवादी र केही मधेसवादी दलहरुलाई पनि संविधान निर्माणको हिस्सेदार बनाइने बताउनुभयो । ‘सबैको साझा संविधान ल्याउन जरूरी छ’, उहाँले भन्नुभयो, ‘त्यसो हुँदा बाहिर रहेका दलहरुलाई पनि संविधान निर्माणमा सहभागी गराइनेछ ।’
संघीयता, लोकतन्त्र, गणतन्त्र, समावेशीता, धर्मनिरपेक्षतालाई संस्थागत गर्न सरकार लागि परेको भन्दै उहाँले यी सबै विषयलाई सार्थक विन्दुमा पु¥याउन संविधान निर्माण गर्नुपर्ने बताउनुभयो । उपप्रधानमन्त्रीसिंहले संविधान निर्माणपछि शान्तिप्रक्रियाका बाँकी रहेका कामहरु गरी प्रतिबद्धता पूरा गरिने स्पष्ट पार्नुभयो ।
कार्यक्रममा २०४२ सालको सत्याग्रहमा योगदान गरेका नेपाली कांग्रेसका ७५ जना पुराना कार्यकर्ताहरुलाई सम्मान गरिएको थियो । नेपाली कांग्रेस क्षेत्र नं. २ का क्षेत्रीय सभापति कुमार कार्कीको अध्यक्षतामा भएको कार्यक्रममा चितवन क्षेत्र नं. २ का सभासद् शेषनाथ अधिकारी, नेपाली कांग्रेस चितवनका सभापति टेकप्रसाद गुरूङ, रत्ननगर नगर सभापति रुपनराज घिमिरेलगायतले बोल्नुभएको थियो ।