५१ जनाद्वारा रक्तदान

रत्ननगर । हंस बहुउद्देश्यीय सहकारी संस्था र नवदुर्गा आमा समूह रत्ननगर–१ ले संयुक्त रुपमा सौराहाचोकमा रक्तदान कार्यक्रम सम्पन्न गरेको छ । कार्यक्रममा १२ जना महिलासहित ५१ जनाले रक्तदान गरेको संस्थाका उपाध्यक्ष बाबुराम अधिकारीले जानकारी दिनुभयो ।
नेपाल रेडक्रस सोसाइटी चितवनकी कोषाध्यक्ष अनिता मैनाली प्रमुख अतिथि रहनुभएको थियो । प्रमुख अतिथि मैनालीले चितवनमा अहिले दैनिक २५०० युनिट भन्दा बढी रगत अभाव भएको बताउँदै रक्तदान कार्यमा सहभागी भई पुण्य कमाउन आग्रह गर्नुभयो ।
हंस बहुउद्देश्यीय सहकारी संस्थाका कार्यकारी अध्यक्ष दिनेशकुमार चुकेको अध्यक्षतामा सम्पन्न उक्त कार्यक्रममा नवदुर्गा आमा समूहकी अध्यक्ष एञ्जिला कुँवरले स्वागत मन्तव्य राखेकी थिइन् ।
कार्यक्रमलाई नेपाल रेडक्रस सोसाइटी भरतपुरको प्राविधिक टोलीले सहयोग गरेको थियो ।