रत्ननगर । प्रहरी र जनताबीचको सहकार्यवाट मात्र समाजमा शान्ति, सुरक्षा र अमनचयन कायम गर्न सम्भव रहेको समाजका अगुवा नागरिकहरुले बताएका छन् ।
इलाका प्रहरी कार्यालय रत्ननगरले बुधबार आयोजना गरेको सार्वजनिक सुनुवाइका अवसरमा उनीहरुले प्रहरीले गर्ने रहेक काममा जनतासँगको सहकार्यले मात्र सार्थकता पाउने बताएका छन् । काम गर्नेक्रममा प्रहरीले पनि विभेदकारी नीति अपनाउने गरेको भन्दै उनीहरुले नागरिकलाई सुरक्षा प्रदान गर्ने काममा प्रहरी चनाखो हुुन जरुरी रहेको बताएका थिए ।
जनता अराजक र प्रहरी निरङ्कुश बन्ने परिपाटी मौलाएको भन्दै अगुवाहरुले त्यसको अन्त्य नभएसम्म सुशासन स्थापित गर्न मुस्किल हुने धारण राखेका थिए ।
कार्यक्रममा उद्योग वाणिज्य संघ रत्ननगरका अध्यक्ष ज्ञानबहादुर विसुरालले नागरिकलाई सुरक्षाको प्रत्याभूति दिलाउने काममा प्रहरीसँग सहकार्य गरेर अगाडि बढ्न तयार रहेको बताउनुभयो । उहाँले बजार क्षेत्रमा ट्राफिक व्यवस्थापन मजबुत, सौराहाचोकमा प्रहरी बिट निर्माण र चितवनका जडान गरिएका सीसी क्यामराको प्रभावकारी रुपले प्रयोग गर्न आवश्यक रहेको बताउनुभयो ।
रत्ननगर नगरपालिकाका कार्यकारी अधिकृत सहदेवप्रसाद श्रेष्ठ प्रमुख अतिथि रहनुभएको सो कार्यक्रममा जिल्ला प्रशासन कार्यालयका बजार संरक्षण अधिकृत विष्णुभक्त पौडेल, नेपाल पत्रकार महासंघ चितवनका कोषाध्यक्ष होमनाथ सापकोटा, नागरिक सरोकार मञ्च रत्ननगरका निर्वतमान अध्यक्ष चन्द्रकान्त ओझालगायतले वोल्नुभएको थियो ।
कार्यक्रममा नेकपा एमालेका नगर अध्यक्ष प्रेमनाथ दुवाडी, नेपाली काँग्रेसका क्षेत्रीय अध्यक्ष कुमार कार्की, स्थानीय महेशप्रसाद रौनियारले प्रहरी जनताप्रति उत्तरदायी भएर काम गर्न नसकेको गुनासो गरेका थिए ।
समाजका अगुवाहरुको गुनासो र धारणा सुनिसकेपछि इलाका प्रहरी कार्यालयमका प्रमुख प्रहरी नायव उपरीक्ष(डिएसपी)टिका बहादुर कार्कीले समाजमा शान्ति सुरक्षा कायम गर्न नगरिकसँग सहकार्य गरेर सार्थक काम गरिने बताउनुभयो ।
सामुदायिक सेवा केन्द्र रत्ननगरका अध्यक्ष भूपेन्द्र अधिकारीको अध्यक्षतामा भएको सो कार्यक्रममा इलाका प्रहरी कार्यालयका प्रहरी निरीक्षक केदार पन्तले कार्यक्रमको उद्देश्यका बारेमा प्रकाश पार्नुभएको थियो ।
Discussion about this post