निर्वाचन प्रचारप्रसार प्रभावकारी बनाउँदै एमाले

भरतपुर । सविधानसभाको उपनिर्वाचनको प्रचारप्रसार तीव्र बनाउन नेकपा एमाले जिल्ला कमिटीले विभागका प्रमुख अरुण पीडित भण्डारीको संयोजकत्वमा ५०१ सदस्यीय उपनिर्वाचन प्रचारप्रसार समिति गठन गरेको छ ।
प्रचारप्रसारलाई प्रभावकारी रुपमा अगाडि बढाउन जिल्ला कमिटी सचिवालय सदस्य केशवप्रसाद रेग्मी, सदस्यहरु कृष्णराज न्यौपाने (लव्ली), राजु पौडेल, रामसिंह विक, माया लामिछाने, विजय विकसहित सल्लाहकारहरु कमलबहादुर मल्ल, कुलप्रसाद सापकोटा, धर्मराज प्रसाईसहितको २५ सदस्यीय सचिवालयसमेत गठन गरेको प्रचार विभागका प्रमुख अरुण पीडित भण्डारीले बताउनुभयो ।
विभागको बुधबार बसेको बैठकमा पार्टीका जिल्ला अध्यक्ष जगन्नाथ थपलिया, राष्ट्रिय प्रतिनिधि परिषद् सदस्य विजय सुवेदीलगायतले उपनिर्वाचनमा पार्टीको विजयको लागि प्रचारप्रसारको काम भव्य रुपमा अगाडि बढाउन शुभकामना मन्तव्य व्यक्त गर्नुभएको थियो ।
बैठकले उपनिर्वाचनको गतिविधिलाई सभ्य र भव्य रुपमा प्रचारप्रसार गर्न गराउनका लागि न्युज डेस्कको स्थापना समेत गरेको छ ।
चितवनको क्षेत्र नं. ४ मा नेकपा एमालेको तर्फबाट उम्मेद्वार बन्की दिलकुमारी रावल (पार्वती) को विजयका लागि प्रचारप्रसार प्रभावकारी रुपमा अगाडि बढाउन १५ गते बिहीबार प्रचाराप्रसार समितिको बृहत् भेला समेत राखिएको प्रमुख भण्डारीले बताउनुभयो ।
यसैबीच भरतपुर नगरपालिका वडा नं. ८ मा रहेको वडास्तरीय निर्वाचन प्रचारप्रसारको कार्यालयमा प्रचारप्रसारको कार्ययोजना सहितका विषयमा छलफल कार्यक्रम सम्पन्न भएको छ । वडा कमिटीका अध्यक्ष नवराज खनालको अध्यक्षतामा भएको कार्यक्रमको प्रमुख अतिथि प्रचार विभागका प्रमुख भण्डारी रहनुभएको थियो ।