कमल थापा पुनः अध्यक्ष

काठमाडौं । राष्ट्रिय प्रजातन्त्र पार्टी नेपालको अध्यक्षमा कमल थापा निर्वाचित हुनुभएको छ । पार्टीको केन्द्रीय कार्यसमितिको मंगलबार राति सम्पन्न निर्वाचनमा एक हजार ५४६ मत ल्याई उहाँ अध्यक्षमा निर्वाचित हुनुभएको हो । उहाँका प्रतिद्वन्द्वी पदमसुन्दर लावतीले १६८ मत प्राप्त गर्नुभएको थियो ।
त्यसैगरी धवलशम्शेर राणा, राजु पराजुली, राजाराम श्रेष्ठ, चन्द्रबहादुर गुरुङलगायत नेताहरु केन्द्रीय सदस्यमा निर्वाचित हुनुभएको छ । १२७ सदस्य केन्द्रीय कार्यसमितिमा अध्यक्ष र ६३ सदस्यको निर्वाचन सकिएको हो । बाँकी ६३ सदस्य नवनिर्वाचित अध्यक्षले मनोनयन गरी पदाधिकारीसमेत चयन गर्ने पार्टीका नेता राजाराम श्रेष्ठले जानकारी दिनुभयो । रासस