भरतपुर । सञ्चारकर्मी रमेश रानामगर नायकको भूमिकामा दर्शकमाझ उपस्थित भएका छन्। चितवनको रत्ननगर ११ मंगलपुर स्थायी घर भएका मगर अभिनित चलचित्र ‘मिह्री’ अर्थात् भाग्य प्रदर्शनको तयारीमा छ। घटस्थापनाको अवसर पारेर शनिबार चलचित्रको गीत ‘के मेरो माया लाग्छ र’ सार्वजनिक भएको छ। चलचित्रको गीतमा रमेश रानामगर र सनम आलेमगरको रोमान्स देख्न सकिन्छ।
लामो समयदेखि टेलिभिजन कार्यक्रममा काम गरेको अनुभवका आधारमा पनि रमेशलाई क्यामेरासँग खेल्न त्यति गाह्रो भएन। मेला महोत्सवमा प्रतियोगितामा सहभागी हुनका लागि तयार गरिने नृत्यमा निर्देशन गर्दै आएका उनले यही चलचित्रमार्फत आफूलाई नायक, लेखक तथा निर्देशकको रूपमा उभ्याउने प्रयास गरेका छन्।
नयाँवर्षको अवसर पारेर गएको बैशाख महिनामै प्रदर्शन गर्ने तयारी गरे पनि कोरोना कहरका कारण प्रदर्शन कहिले हुने भन्ने विषयमा अन्यौलता कायमै छ। तर, अब वातावरण बिस्तारै सहज होला कि भन्ने अपेक्षासहित चलचित्रको पहिलो गीत मझेरी टिभी नामक युट्युब च्यानलमार्फत सार्वजनिक गरिएको उनले बताए।
मगर संस्कृतिमा आधारित नेपाली चलचित्र मिह्रीको अधिकांश दृश्य तनहुँमा छायांकन गरिएको छ भने केही अंश चितवन र कास्कीमा छायांकन गरिएको छ। चलचित्रमा अन्य कलाकारहरूमा ईश्वर रानामगर, प्रीज्मा आलेमगर, स्रष्टी थापामगर, आशिक रानामगर, प्रेमकुमारी आलेमगर, भीमबहादुर थापामगर, बलबिक्रम थापामगर, देवी आलेमगर, मिलन पाटामगरलगायतले अभिनय गरेका छन्।
घना गुरूङको छायांकन तथा सम्पादन रहेको चलचित्रलाई अमृता थापा रानामगर, देवेन्द्र रानामगर, प्रेमकुमारी आलेमगरले निर्माण गरेका हुन्। सञ्चार क्षेत्रमा निकै लोकप्रियता कमाएका रमेश रानामगरले चलचित्र क्षेत्रमा पहिलो प्रयास भए पनि सबैले मन पराइदिनेमा आफू आशावादी रहेको बताए।
कोरोना कहर कम हुँदै गएको खण्डमा सरकारले चलचित्र हलहरू खुला गर्ने निर्णय गरेलगत्तै चलचित्र प्रदर्शन गरिने उनले बताए। चितवनबाटै मगर संस्कृतिमा आधारित चलचित्र निर्माण यो नै पहिलोपटक हो। कलाकार तथा निर्माण युनिट पनि अधिकांश चितवनकै रहेका छन्।
Discussion about this post