रत्ननगर अस्पतालमा डाइलोसिस सेवा सञ्चालन

रत्ननगर । अस्पतालले प्रदान गर्ने सेवासुविधाको बारेमा नागरिकलाई जानकारी नहुँदा ओझेलमा परेको रत्ननगर अस्पतालमा अत्याधुनिक डाइलोसिस सेवा सुरू गरिएको छ । अस्पतालले आइतबार पत्रकार सम्मेलनको आयोजना गरी डाइलोसिस सेवा सुरू गरिएको जानकारी गराएको थियो ।
अस्पतालले राष्ट्रिय मृगौला उपचार केन्द्र काठमाडौंको सहकार्यमा यो सेवा संचालन गरेको हो । चितवनमा सदरमुकाम भरतपुरका दुई वटा मेडिकल कलेजले मात्रै डाइलोसिस सेवा दिँदै आएका छन् । अस्पतालका प्रमुख डा. कृष्णप्रसाद पौडेलले चितवनको पूर्वी क्षेत्रमा सञ्चालनमा रहेको अस्पतालमा डाइलोसिस सेवा सुरू हुनु सुखद् रहेको बताउनुभयो ।
रत्ननगर अस्पतालमा यो सेवा सुरू भएपछि ग्रामीण क्षेत्रका जनताले सेवा मात्र नपाउने उहाँले डाइलोसिस गर्दा महँगो शुल्क तिर्नुपर्ने बाध्यता समेत हटने बताउनुभयो । प्रमुख पौडेलले घर नजिकैको अस्पतालमा सुरू भएको सेवा उपयोग गर्न आग्रहसमेत गर्नुभयो ।
राष्ट्रिय मृगौला उपचार केन्द्रका डाक्टर ऋषिकुमार काफ्लेले रत्ननगरमा यो सेवा सुरू हुनु यस क्षेत्रका नागरिकको लागि महत्वपूर्ण अवसर भएको बताउनुभयो । उहाँले रत्ननगर अस्पतालले भरतपुरको सरकारी अस्पतालसँग सहकार्य गरेर सेवा संचालन गरे पूर्वी चितवन बाहेक अन्य क्षेत्रका बिरामीहरु पनि रत्ननगर आउन बाध्यता हुने बताउनुभयो ।
अहिले पाँच वटा मेसिन यहाँ ल्याइएको र यो सेवा संचालन गर्न करिब २ करोडको लागत लाग्ने अस्पतालले जनाएको छ । अस्पताल संचालन तथा व्यवस्थापन समितिका अध्यक्ष जनि अहमद शेखले रत्ननगर अस्पतालमा सेवा वृद्धि गरी पूर्वी चितवनवासीलाई मात्र होइन तराईका सबै जनतालाई सेवा प्रदान गर्ने उद्देश्य अनुरुप सो सेवा सुरू गरिएको बताउनुभयो ।