युवाहरुद्वारा बूढीराप्ती नदीको सरसफाइ

बछौली । पूर्वी चितवनको बछौली–१ बोद्रहनीका युवाहरुले हात्ती प्रजनन् केन्द्र हुँदै बग्ने बूढीराप्ती नदीमा आइतबार सरसफाइ गरेका छन् । जथाभावी फालिएको फोहोर र जलकुम्भी झारले नदी दूषित हँुदै गएपछि युवाहरुले सरसफाइ गरेका हुन् ।
बाघमारा मध्यवर्ती सामुदायिक वनको आर्थिक सहयोगमा वन अन्तर्गतको बोद्रहनी टोल समितिको अगुवाइमा नदी सरसफाइ गरिएको हो । स्थानीय ४० जना युवाहरुको सक्रियतामा खोलामा अनियन्त्रित तबरले फैलिएको जलकुम्भी झार उखालेर फाल्नुका साथै नदीमा फालिएका प्लाष्टिक, बोतल, कपडा संकलन गरी नष्ट गरिएको टोल समितिका संयोजक सोमबहादुर तामाङले जानकारी दिनुभयो ।
युवाहरुले बूढीराप्ती नदीको २ किलोमिटर सरसफाइ गरेको संयोजक तामाङले जानकारी दिनुभयो । नेपालको एकमात्र हात्ती प्रजनन् केन्द्रको अवलोकनको लागि विदेशी पर्यटक आउने र नदी दूषित देख्दा गलत सन्देश जान सक्ने भएकाले युवाहरु मिलेर नदी सरसफाइ गरिएको संयोजक तामाङले बताउनुभयो ।
विगतमा संरक्षणको काम गर्दै आएका बोद्रहनीका युवाहरुले पर्यटकीय नगरी सौराहासँग जोडिएको सो नदीको सुन्दरता कायम गर्न सरसफाइ गरेका हुन् । युवाहरुले नदी सरसफाइ गरेपछि पर्यटन तथा संरक्षणको क्षेत्रमा लागेका संघसंस्था र व्यक्तिहरुले त्यसको प्रशंसा गरेका छन् । उत्साहित भएर नदी सरसफाइ गर्न सुरू गरेका युवाहरुलाई हौसला प्रदान गर्न सामुदायिक वनका उपाध्यक्ष रामकाजी अधिकारी, सदस्यहरु राजन भट्ट, इन्द्रबहादुर रानामगर, वीरबहादुर तामाङ, समाजसेवीहरु अशोक दराई, सेवक लामिछानेले पनि नदीको सरसफाइ गर्नुभएको थियो ।