प्रहरी प्रशासनको उत्तरदायित्व

प्रहरीले नागरिकप्रति उत्तरदायित्व वहन गर्नैपर्छ । समाजमा प्रहरीको छाप सधैँ सकारात्मक हुनुपर्छ । असल प्रहरीको जुनसुकै ठाउँमा पनि प्रशंसा हुने गर्दछ । समाजमा शान्ति र सुव्यवस्था कायम गर्न, गराउनका लागि नै प्रहरी संगठनको स्थापना गरिएको हो । तर, सरकारी सेवामा आबद्ध रहेका केही प्रहरीको बानीव्यहोराका कारण सिंगो प्रहरी प्रशासनकै बद्नामी हुने गर्दछ । भ्रष्ट आचरण भएका प्रहरीका कारण समाजमा नराम्रो नजिर स्थापित हुने गर्दछ । यस्तो स्थिति केही घटिरहे पनि घुमुवा प्रहरीले विभिन्न व्यापारीबाट हप्ता असुल्ने गरेको पाइएको छ । संगठनका उपल्ला दर्जाका प्रहरीहरुको नाम भजाएर हप्ता असुली गर्ने पाँच जना घुमुवा प्रहरी निलम्बनमा परिसकेका छन् । निलम्बनमा परेका घुमुवा प्रहरीको लागूऔषध कारोबारी र अन्य आपराधिक गतिविधिमा संलग्न व्यक्तिहरुसँग साठगाँठसमेत रहेको बुझिएको छ ।
चितवनमा गुन्डा तह लगाउने अभियान सफल भइरहेको छ । चितवन प्रहरी प्रमुख एसपी प्रद्युम्नकुमार कार्कीले चितवनमा आफ्नो कार्यभार सम्हालेलगत्तै जुनसुकै आवरणमा रहे पनि गुन्डागर्दी तह लगाइछाड्ने प्रतिबद्धता जनाएका थिए । उनले चितवनको गुन्डागर्दी निस्तेज गर्दै हप्ता असुली गर्नबाट व्यवसायीहरुलाई राहत दिए । त्यस्तै, शान्ति सुरक्षाको सवालमा पनि प्रहरी प्रमुखको कार्यकाल सुखद नै रहेको मान्नुपर्छ । प्रहरी प्रशासनभित्र ‘वैधानिक गुन्डा’का रुपमा देखिएका घुमुवा प्रहरीले हप्ता असुली गरेको थाहा पाएपछि उनले त्यस्ता प्रहरीलाई निलम्बन गरेर प्रहरी प्रशासनलाई स्वच्छ बनाउने प्रयास गरेका छन् । आफ्नो कार्यकालमा ४८ जना प्रहरीलाई विभिन्न कारबाही गरेर समाजको शान्ति सुरक्षाप्रति जवाफदेही रहेको सन्देश दिएका छन् ।
प्रहरीले आफ्नो बर्दीको सधैँ इज्जत गर्नुपर्छ । कतिपय ठाउँमा घुमुवाबाहेक अन्य प्रहरी कर्मचारीले पनि झैझगडा गर्ने र बर्दीसहित मापसे गर्ने गरेको पाइएका छन् । यस्ता प्रहरीका कारण सिंगो प्रहरी प्रशासनप्रति जनविश्वास गुम्ने खतरा रहन्छ । केही समययता आपराधिक गतिविधि नियन्त्रणमा प्रहरीको सक्रियता बढेपछि आमनागरिकमा खुसीको सञ्चार भइरहेको छ । प्रहरीको सक्रियतामा मापसे अभियान पनि न्यूनीकरण भइरहेको छ । सामाजिक असुरक्षा घटेको छ । प्रहरी प्रमुखले अनुशासनहीन प्रहरीलाई कारबाही गरेर सकारात्मक काम गरेका छन् । आर्थिक प्रलोभन र भ्रष्टाचारबाट मुक्त रहेर प्रहरीलाई मर्यादित बनाउन प्रहरी प्रमुखले खेलेको भूमिका प्रशंसा गर्न लायक छ । आगामी दिनमा पनि प्रहरी प्रशासनले उत्तरदायि¤व बोध गर्दै प्रहरीको गरिमा बढाउन सक्नु परेको छ ।