नेविसंघको क्षेत्रीय अधिवेशन आज

गैँडाकोट । नेपाल विद्यार्थी संघ नवलपरासी क्षेत्र नं ३ को क्षेत्रीय अधिवेशन शुक्रबार स्थगित गरी आज शनिबार गरिने भएको छ ।
नेविसंघ जनक कलेजका सभापति विजय सापकोटाले दिएको जानकारी अनुसार नेपाली काँग्रेस नवलपरासी जिल्लाका पूर्व उपसभापति एवम् क्षेत्र नं. ४ महासमिति सदस्य महादेव गुप्ताको निधन भएका कारण अधिवेशन स्थगित हो ।
क्यान्सरले पीडित गुप्ताको बिहीबार निधन भएको हो । दिवंगत गुप्ताप्रति शोक व्यक्त गर्दै अधिवेशन स्थगित गरेको नेविसंघका जिल्ला उपाध्यक्ष चित्रध्वज जिसीले जानकारी दिनुभयो ।
यसैबीच क्षेत्र नं १ का महासमिति सदस्य मदनभक्त अधिकारीले शोक विज्ञप्ति जारी गर्दै गुप्ताको निधनले पार्र्टीलाई अतुलनीय क्षति पुगेको भन्दै शोक सन्तप्त परिवारजनप्रति समवेदना प्रकट गर्नुभएको छ । गुप्ता १८ वर्षसम्म नवलपरासी जिल्ला उपसभापति रहनुभएको थियो ।