रोटरी सामुदायिक गाउँको स्थापना

दाहाखानी । रोटरी क्लब अफ नारायणगढले बिहीबार दाहाखानी–७ खेतबारीलाई विधिवत रुपमा रोटरी सामुदायिक गाउँ भनेर स्थापना गरेको छ । क्लबका अध्यक्ष सहनलाल प्रधानले रोटरी इन्टरनेशलनबाट मान्यता प्राप्त प्रमाणपत्र आरसीसी खेतबारीका संयोजक दुर्गाबहादुर तामाङलाई हस्तान्तरण गर्नुभयो । गरिबी र पिछडिएको समुदायलाई लक्षित गरेर क्लबले खेतबारीलाई रोटरी सामुदायिक गाउँको रुपमा विकास गर्न लागेको हो ।
कार्यक्रममा बोल्दै क्लबका अध्यक्ष प्रधानले खेतबारी गाउँ रोटरीको संसारमा प्रवेश गरेको दिन भएकाले योे दिन गौरबको रुपमा रहेको बताउनुभयो । सफा खानेपानी, स्वास्थ्य, शिक्षा र सामाजिक सुरक्षाको विषयमा रोटरीका कार्यक्रम केन्द्रित हुने भन्दै उहाँले गाउँ विकासका लागि रोटरी क्लब माध्यम मात्र भएको बताउनुभयो ।
यसैबीच बिहीबारै सोही गाउँमा तीन महिने सिलाइकटाइ तालिमको उद्घाटन गरिएको छ । तालिमको रोटरी क्लब अफ नारायणगढका संस्थापक अध्यक्ष निरञ्जन प्रधानले उद्घाटन गर्नुभयो ।
सो अवसरमा कार्यक्रमका संयोजक राजेन्द्र वली, राष्ट्रिय प्राथमिक विद्यालय खेतबारीका प्राधानाध्यापक प्रेम बराल, क्लबका सचिव सुदीप श्रेष्ठलगायतले बोल्नुभएको थियो ।
क्लबले सिलाइ कटाइका लागि ४ वटा मेसिन, कैची, धागो, र त्यसमा आवश्यक पर्ने सामग्रीहरु पनि प्रशिक्षक निरमाया गुरुङलाई हस्तान्तरण गरेको छ । क्लबले यसअघि पनि सो गाउँको विद्यालयमा शैक्षिक सामग्री वितरण, बाल स्वास्थ्य शिविर सम्पन्न गरिसकेको छ ।