गुणस्तरको आधारमा होटलहरुलाई रंगीन स्टीकर

गैँडाकोट । राजमार्ग आडका होटल राम्रो र नराम्रो भन्ने दुविधा हटाउन सरकारले त्यस्ता होटलको स्तर मूल्याङ्कन गरेर स्टीकर टाँस्न थालेको छ । खाद्य प्रविधि तथा गुण नियन्त्रण विभागले एक वर्षअघि मेची महाकाली खाद्य स्वच्छता अभियान सुरू गरेको थियो ।
सो अभियान सुरू भएपछि हालसम्म छ वटा बजार क्षेत्रमा रहेका २५८ होटलको अनुगमन भएको छ । त्यसरी अनुगमन भएकामध्ये जसमा १५ वटा होटल मात्रै उत्तम ठहरिएका विभागका अधिकारीहरुले जानकारी गराए । मध्यामाञ्चल, मध्यपश्चि–माञ्चल र सुदूरपश्चिमाञ्चलको राजमार्ग आडका छ वटा बजार क्षेत्रमा अनुगमन सम्पन्न गरेको विभागले सोमबारदेखि पश्चिमाञ्चलको नवलपरासी गैंडाकोटबाट अनुगमन सुरू गरेको छ । यो पटक नवलपरासीकै दाउन्नेसम्म अनुगमन हुनेछ । अनुगमन पश्चात् विभागको टोलीले होटलमा हरियो, पहेलो र रातो स्टीकर टाँस्ने गर्छ ।
उत्तम स्तरको होटललाई हरियो, मध्यम स्तरको होटललाई एउटा रातो घर्सो भएको पहेलो र न्युन स्तर भएको होटललाई दुई वटा रातो घर्सो भएको पहेलो रंगको स्टीकर दिने विभागका महानिर्देशक जीवनप्रभा लामाले जानकारी दिइन् । त्यस्तै खराब अवस्थाको होटललाई रातो रंगको स्टीकर टाँसेर बन्द गर्न निर्देशन दिइन्छ ।
होटल तथा रेष्टुरेन्टको यसरी स्तर निर्धारण गर्नुभन्दा अघि सो क्षेत्रमा होटल व्यवसायीहरुको संलग्नतामा खाद्य स्वच्छतर स्वयम्सेवक समूह गठन गरिने महानिर्देशक लामाले बताइन् । सो स्वयम्सेवक समूहले होटलले अपनाउनुपर्ने मापदण्डका सम्बन्धमा प्रचारप्रसार गर्छ । त्यसपछि विभागको केन्द्रीय टोली आएर अनुगमन पश्चात् स्टीकर प्रदान गर्छ ।
विभागका खाद्य अनुसन्धान अधिकृत ईश्वर सुवेदीले दिएको जानकारी अनुसार हालसम्म चितवनको रामनगर र मुग्लिन, धादिङको मलेखु, धनुसाको ढल्केबर, बर्दियाको कोहलपुर र कैलालीको चिसापानीमा रहेका होटलहरुको अनुगमन सम्पन्न गरेको छ । खाना र नास्ता खान धेरै यात्रु बसहरु रोकिने क्षेत्रलाई पहिलो प्रथामिकतामा राखेको सुवेदीले बताए ।
‘सर्रर बस रोकिएर हुरर्र खाना खाएपछि यात्रुहरु कोही कता कोही कता पुग्छन् भनेर खानाको गुणस्तरमा ध्यान नदिने परिपाटी हुन्छ । त्यसैले हामीले यात्रुलाई खाना नास्ता खुवाउने होटल रेष्टुरेन्टमा ध्यान केन्द्रित गरेका हौं’, खाद्य अधिकृत सुवेदीले भने । होटलको खानाका कारण रोग लागे एक ठाउँको रोग देशभर फैलने खतरा रहने उनले बताए ।
होटलहरुमा ग्राहकले देख्ने ठाउँमा स्टीकर टाँस्ने गरिन्छ । स्टीकर देखेपछि ग्राहकले कुन होटल कस्तो स्तरको हो भने मेसो पाउने सुवेदीले बताए । होटलको स्तर र स्टीकरका बारेमा यात्रुहरुलाई जानकारी दिन विाभागले चाडै नै लामो दूरीका यात्रु बसहरुमा पनि सूचना टाँस्ने व्यवस्था गर्न लागेको छ ।
स्टीकर टाँसेपछि होटलको अनुगमन स्वयम्सेवक समूहले नै गर्नेछ । त्यस्तै जिल्लाका सरकारी अधिकारी खाद्य निरीक्षकले छ महिनामा एक पटक निरीक्षण गर्नेछन् । निरीक्षणमा होटलको मापदण्ड खस्केको या सुर्धेको हेरेर स्टीकरको रंगको सम्बन्धमा पुनर्विचार हुने गर्छ ।
‘स्टीकर टाँसेपछि भएको अनुगमनमा हरियो टाँसेको ठाउँमा स्तर खस्केर पहेलो रंगको स्टीकर टाँस्नु पर्ने अवस्था भने आएको छैन । पहेलो स्टीकर पाएका पाँचवटा होटेलहरुले स्तर सुधार गरेर हरियो स्टीकर भने पाएका छन्’ विभागका महानिर्देशक लामाले भनिन् । राजमार्गमा अनुगमन सकेपछि बजारका फाष्टफुड सेन्टरहरुमा अनुगमन गर्ने उनले बताइन् ।