‘आश्रमको बास, सरकारी धनको नाश’

दिपेन्द्र अधिकारी
भरतपुर । प्रधानन्यायाधीश दामोदरप्रसाद शर्माको देवघाटमा आश्रम छ । यस आश्रमको हेरचाह तीन जनाले गरिरहेका छन् । आश्रमकोे हेरचाहमा खटिए पनि जिल्ला अदालत चितवन र पुनरावेदन अदालत हेटौंडाबाट उनीहरुले नियमित तलब सुविधा लिइरहेका छन् । उनीहरु हुन् भनपा–१ बस्ने सीता सिलवाल, रुपेश सिलवाल र रुपेश महतो ।
सीता र महतो चितवन अदालतमा क्रमशः तामेल्दार र कार्यालय सहायकका रुपमा जागिरे छन् । सीता चितवन अदालतमा १ वर्ष पहिले तामेल्दारको रुपमा करारमा नियुक्ति भएकी हुन् भने महतोले जागिर खाएको ६ महिनामात्र भएको छ । तामेल्दारलाई डिठ्ठा सरह मानिन्छ । सीताको सहोदर भाइ रुपेश भने पुनरावेदन अदालत हेटौंडामा ६ महिनाअघि सुब्बामा करारमा नियुक्त भएका थिए । छिमेकीहरु सीतालाई ‘सीतामाता’ भन्छन् ।
पहुँचको आधारमा जागिर खाएका उनीहरु कहिलेकाँही मात्र कार्यालय पुग्छन् । प्रधानन्यायाधीश शर्माले पदको दुरूपयोग गरी चितवन देवघाटमा बन्दै गरेको निजी घरको रेखदेख गर्ने तीन जनालाई चितवन र हेटौंडा अदालतबाट तलब खुवाउने गरेका हुन् । प्रधानन्यायाधीशको मान्छे भएकाले अन्य कर्मचारीले उनीहरुलाई केही भन्न गर्न सक्दैनन् । आश्रममै रहेर करारमा जागिर खाने उनीहरु ३ जना भएपनि अन्य ३ दर्जन बढी व्यक्तिलाई शर्माले पहुँचकै आधारमा विभिन्न जिल्लाका अदालतमा जागिर दिएको खुल्न आएको छ ।
हाल सुब्बाको तलब स्केल १७ हजार पचास रूपैयाँ, डिठ्ठाको १६ हजार ११० र कार्यालय सहयोगीको ११ हजार ८०० रहेको छ । निजी घर वा आश्रमको हेरचाहमा खटिने कर्मचारीले कहिलेकाँही अदालत आएको भरमै सरकारी सुविधा लिइरहेका छन् ।
चितवन अदालतमा प्रधानन्यायाधीश शर्माको मात्रै हुकुम चल्दैन । सर्वोच्चका अर्का न्यायाधीश रामकुमार शाहका भाइबुहारी रञ्जना चौधरी पनि करारमै जागिर खाइरहेकी छन् । सिलवाल र महतोको तुलनामा चौधरी कार्यालयमा प्रायः आउने गरेको अदालत स्रोतले जनायो ।
भरतपुर नगरपालिका–१ देवघाटमा शर्माको घर बनिरहेको छ । ‘श्री अखण्डानन्द निकेतन’ नाम दिइएको २४ कोठे ठूलो घरको काम जारी छ । झण्डै २ करोड बढीको लागतमा घर निर्माण भएको एक कर्मचारीले बताए । श्री अखण्डानन्द निकेतन नामचाहिँ शर्माको गुरूको नाम हो ।
महिनामा एक पटक जसो यहाँ आउछन् शर्मा । शर्मा आउँदा कुनै पनि कर्मचारी अदालत जाँदैनन् । रुपेशलाई अस्थायी नियुक्ति दिन चितवन अदालतमै दबाब दिएपनि कसै गरेपनि नसकिने जवाफ अदालतबाट पाएपछि रुपेशलाई पुनरावेदनमा नियुक्ति दिइएको हो ।
चितवन अदालतमा कार्यालय सहायकका रुपमा जागिर खाएका २० वर्षीय युवा रुपेश महतो हुन् । उनले आफ्नो परिचय महतो मण्डल बताएपनि अदालतमा उनको नाम रुपेश महतो रहेछ । उनी एसएलसी उत्तीर्ण छैनन् । उनका काका शम्भु महतो वीरगंज अदालतमा रहेछन् । उनकै निकट सम्पर्कबाट महतोले प्रधानन्यायाधीश कहाँ जागिर पाएका रहेछन् । महतो स्वयम्ले कहिलेकाँही कार्यालय जाने र जाँदाको दिनमा पनि ११ बजेतिर गएर २ बजे फर्कने गरेको बताए ।
लोकसेवा आयोग लामो समयपछि यसवर्ष खुल्ने भएकाले आगामी ६ महिनामा करारको समस्या समाधान हुने कर्मचारीहरु बताउँछन् । चितवन जिल्ला अदालतमा ४७ जनाको दरबन्दी रहेको छ । सबै भन्दा बढी तामेल्दार पदमा ५ जना करारमा नियुक्त भएका हुन् । कुल ११ कर्मचारी विभिन्न पदमा करारमा नियुक्त भएको अदालतले जनाएको छ । हाल करार र दरबन्दी गरी कुल ४५ जना कार्यरत छन् ।