पर्सा । पूर्वी चितवनको पर्सा साना सहरी तथा सरसफाइ उपभोक्ता संस्थाको आयोजना क्षेत्रभित्र थप नयाँ योजना निर्माण हुने भएको छ ।
बढ्दो जनघनत्वलाई मध्यनजर गर्दै खानेपानी वितरणलाई सहज बनाउन थप आयोजना निर्माण गर्न लागिएको पर्सा साना सहरी तथा सरसफाइ उपभोक्ता संस्थाका अध्यक्ष शेरमान तामाङले जानकारी दिनुभयो । नयाँ योजना निर्माणका विषयमा शनिबार खैरहनीमा सरोकारवाला निकायबीच बृहत् छलफल कार्यक्रम समेत सम्पन्न भएको छ ।
सम्पन्न कार्यक्रमले साविकको खैरहनी–८ स्थित गौचरनमा ट्याङ्की निर्माण गर्न सहमति जुटाएको समेत अध्यक्ष तामाङले बताउनुभयो । खैरहनी नगर क्षेत्रभित्रका उपभोक्ताई सहज रुपमा स्वच्छ पानी वितरण गर्न गौचरनमा साढे चार लाख लिटर क्षमताको ट्याङ्की निर्माण गर्न लागिएको हो ।
योजना निर्माणका लागि नेपाल सरकार र एशियाली विकास बैंकको ७० प्रतिशत अनुदान, लगत इष्टिमेटको ३० प्रतिशत रकम उपभोक्ताले ब्यहोर्नुपर्ने मध्ये २५ प्रतिशत रकम नगर विकास कोषबाट ऋण लिइने त्यस्तै ५ प्रतिशत रकम नगद जम्मा गर्नुपर्ने प्रावधान रहेको छ । कार्यक्रममा खैरहनी नगरपालिकाका प्रतिनिधि, स्थानीय राजनैतिक दलका प्रमुख तथा प्रतिनिधि, खैरहनी उद्योग वाणिज्य संघ सरोकारवाला स्थानीय संघसंस्थाका प्रतिनिधि, उपभोक्तालगायतको सहभागिता रहेको थियो ।
Discussion about this post