श्रमिक बालबालिकालाई परिवारको जिम्मा

रत्ननगर । रत्ननगर नगरपालिकामा सञ्चालित बालमैत्री स्थानीय शासन कार्यक्रम अन्तर्गत बुधवार ६ जना श्रमिक बालबालिकालाई परिवारको जिम्मा लगाइएको छ । बालमैत्री स्थानीय शासन कार्यक्रम सञ्चालन गर्ने जिम्मेवारी पाएको उद्योग वाणिज्य संघ रत्ननगरले लोथरका दुई जना र शक्तिखोरका ३ र रत्ननगर गरी ६ जनालाई परिवारको जिम्मा लगाउनुका साथै शैक्षिक सामग्रीसमेत वितरण गरिएको संघका अध्यक्ष ज्ञानबहादुर विसुरालले जानकारी दिनुभयो ।
श्रमिक बालबालिकाका अभिभावकलाई जिविकोपार्जनको लागि बाख्रा, सिलाइ मेसिन प्रदान गरिएको उहाँले जानकारी दिनुभयो । त्यसैगरी रत्ननगर–४, देबौलीका एक बालश्रमिकलाई परिवारको जिम्मा लगाइएको अभिभावकको आयआर्जनको लागि ठेला र चटपटका लागि आवश्यक सामग्री हस्तान्तरण गरिएको छ  ।