सरकारको प्रतिरक्षामा एक्लै कोइराला

रत्ननगर । पार्टी निकटका कर्मचारीहरुको संगठनको केन्द्रीय महाधिवेशन उद्घाटन गर्न एक मन्त्रीसहित आइतबार भरतपुर आएका नेपाली कांग्रेसका वरिष्ठ नेता शेरबहादुर देउवा र पार्टी उपसभापति रामचन्द्र पौडेललाई पत्रकारहरुले सरकारको कार्यशैलीका बारेमा प्रश्न राख्दा नकारात्मक टिप्पणी खासै गरेनन् । तर अधिवेशन उद्घाटन स्थलमा भने उनीहरू दुवैले घुमाउरो पारामा गुनासो पोखे ।
सरकारको कार्यशैलीप्रति नेपाली कांग्रेसभित्रै आलोचना हुने गरेको भन्ने खबर सार्वजनिक भइरहेका बेलामा प्रधानमन्त्री सुशील कोइरालाबाहेक मन्त्री तथा अन्य वरिष्ठ नेताले त्यही चर्चालाई बल पुग्ने ढंगले मन्तव्य राखे ।  कार्यक्रममा उपस्थित भौतिक योजना तथा पूर्वाधार निर्माण मन्त्री विमलेन्द्र निधिले सरकारको कामका बारेमा भन्दा कम्युनिष्टको आलोचना गरेर समय बिताए ।
‘म धेरै बोल्दै बोल्दिन’ भनेर मन्तव्य दिन आएका वरिष्ठ नेता शेरबहादुर देउवाले आफ्नो बोली पनि नबुझिने भएकाले धेरै कुरा पार्टी सभापति तथा प्रधानमन्त्री सुशील कोइरालाले नै बोल्ने बताए । आफ्नोभन्दा कोइरालाको बोली प्रष्ट भनेर देउवाले सुशीलप्रति कटाक्ष नै गरे । उनले कर्मचारीका सन्दर्भमा लामो मन्तव्य दिँदा सरकारका बारेमा धेरै कुरा गरेनन् ।
उद्घाटन मन्तव्यका क्रममा पार्टी उपसभापति रामचन्द्र पौडेलले सरकारले पटुका कसेर काम गर्न आवश्यक छ भन्ने सुझाव दिए । आन्तरिक शक्ति कमजोर भएको व्यक्तिलाई हिँडडुल र केही गर्न परेमा पटुका कस्नुपर्ने हुन्छ । सरकारलाई पनि पटुका कस्ने सल्लाहा दिएर पौडेलले घुमाउरो तरिकाले सरकारको कार्यशैलीप्रति प्रहार गरे ।
सत्यनिरूपण तथा मेलमिलाप आयोग तथा बेपत्ता खोजबिन आयोग गठन महत्वपूर्ण काम भए पनि संविधान जारी गर्नका लागि यसरीभन्दा पटुका कसेर काम गर्नुपर्ने अवस्था कायम रहेको पौडेलको टिप्पणी थियो । प्रधानमन्त्री कोइरालाले भने आफ्नो मन्तव्यमा यी दुई कार्यलाई दुरगामी प्रभाव राख्ने महत्वपूर्ण काम भनेर अर्थाएका थिए ।
प्रधानमन्त्री कोइरालाले अधिकांश समय सरकारको प्रतिरक्षा गर्नमा खर्चेका थिए । उनले संविधान सरकारको प्राथमिकता भएकाले संविधान जारी हुनेमा कुनै आशंका नगर्न आग्रह गरे । संविधान जारी भएपछि १० वर्षभित्रमा देशको कायापलट हुने उनको भनाइ थियो ।
सहमतिको सरकार निर्माण गर्न खोज्दा समय लागेको र संयुक्त सरकार बनाएर अगाडि बढ्दा सोचेअनुरूप गर्न नसकेको प्रधानमन्त्री कोइरालाले पनि स्वीकार गरे । सोचेअनुरूप हुन नसक्नुमा आफ्नो मात्रै दोष नभएको कोइरालाको भनाइ थियो ।