‘सुशील दा, रंगशाला खै !’

रत्ननगर । रत्ननगरका दुई छुट्टाछुट्टै संघसंस्थाले शनिबार प्रधानमन्त्री सुशील कोइरालाको ध्यानाकर्षण गराएका छन् । चितवन केरा व्यवसायी समितिले सरकारबाट पाउनुपर्ने राहात र रत्ननगर उद्योग वाणिज्य संघका पदाधिकारीले टिकौलीमा क्षेत्रीयस्तरको रंगशाला निर्माणको लागि प्रधानमन्त्रीको ध्यानाकषण गराएका हुन् ।
संघका वरिष्ठ उपाध्यक्ष अनिलकृष्ण श्रेष्ठ, महासचिव देवेन्द्रकुमार श्रेष्ठ कार्यसमिति सदस्यहरु तथा संस्थापक अध्यक्ष हरिशरण पाठक, पूर्वअध्यक्ष राजेन्द्रकुमार श्रेष्ठ, केशवनारायण श्रेष्ठ, गोपालराज कर्माचार्य, नारायणकाजी श्रेष्ठलगायतको टोलीले प्रधानमन्त्रीलाई भेटेर रंगशाला निर्माणको काम अगाडि बढाउन आग्रह गरेका थिए ।
यसैगरी टोलीले त्रिशुली शक्तिखोर बहुउद्देश्यीय सिँचाई परियोजनाको काम सुरू गर्न पनि आग्रह गरेको पूर्वअध्यक्ष राजेन्द्रकुमार श्रेष्ठले जानकारी दिनुभयो । चितवन केरा व्यवसायी समितिका अध्यक्ष यज्ञप्रसाद सुवेदी सहितको केरा व्यवसायीहरुको टोलीले प्रधानमन्त्रीलाई ज्ञापनपत्र बुझाउँदै राहतको लागि अर्थमन्त्रालयलाई निर्देशन दिन आग्रह गरेका थिए ।