टुहुरा वन्यजन्तु संरक्षणमा समस्या

रत्ननगर । चितवन राष्ट्रिय निकुञ्जमा आउने टुहुरा वन्यजन्तु संरक्षणमा समस्या परेको छ ।
यस्ता वन्यजन्तु राख्ने स्थान नभएको र तिनीहरूकै लागि भनेर बजेट नआउने गरेकाले पालनपोषणमा समस्या परेको निकुञ्जका प्रमुख संरक्षण अधिकृत कमलजङ्ग कुँवरले जानकारी दिनुभयो ।
बर्सेनि निकुञ्जमा बाघ, गैंडा, हात्ती, चितुवालगायत ठूला र संरक्षित जनावर विभिन्न स्थानमा फेला परी ल्याइने गरिन्छ । निकुञ्जमा वन्यजन्तुको उपचार गर्दै आएका पशु चिकित्सक कमल गैंरेले यस्ता जनावरको अस्पताल नै बन्नुपर्ने भएपनि कसैले ध्यान नदिएको बताउनुभयो ।
राख्ने निश्चित स्थान, उपचारका उपकरण आवश्यक भएपनि त्यो नहुँदा आएका धेरै वन्यजन्तु मर्ने गरेको उहाँले बताउनुभयो । मुख्य गरी बाघको आक्रमणमा परी गैंडाका बच्चाहरू फेला पर्ने गरेका छन् ।
बाघ र चितुवाहरू मानव वस्तीमा प्रवेश गरी आतङ्क मच्चाउने गरेपछि निकुञ्जमा ल्याइन्छ । चितवनको सौराहामा रहेको राष्ट्रिय प्रकृति संरक्षणकोषमा अहिले पनि एउटा चितुवा र गैंडाको बच्चा राखिएको छ । चितवन निकुञ्जमा दुईवटा बाघ रहेका छन् ।
तिनीहरूको दैनिक पालनपोषणमा समेत निक्कै खर्च हुने गरेकाले खर्च व्यवस्थापनमा समेत समस्या रहेको निकुञ्जका प्रमुख  कुँवरले बताउनुभयो । अन्य संरक्षित जनावर पनि टुहुरा भएर निकुञ्जमा ल्याइन्छ, बाहिरी जिल्लाको पनि सिफारिस सेन्टर निकुञ्ज भएकाले बर्सेनि दर्जनौं वन्यजन्तु यहाँ ल्याइन्छ ।
सीमित स्रोतसाधनकै बीच ती वन्यजन्तुको संरक्षणमा बर्सेनि दसौँ लाख रुपैयाँ खर्च गर्नुपरेको निकुञ्जको भनाइ छ ।