पुस्तकदेखि मदिरा पसलसम्म पेट्रोल बिक्री, कालोबजारी गर्ने छजना पक्राउ

दिपेन्द्र अधिकारी
भरतपुर । पेट्रोलमा कालोबजारी गर्नेहरुलाई चितवन जिल्ला प्रहरी कार्यालयले समातेको छ । गाउँघरमा मात्र होइन, नगरपालिका क्षेत्रभित्रै पुस्तकपसल, किराना पसल, फेन्सीपसल र मदिरापसलमा पनि पेट्रोल बिक्री गरेर कालोबजारी भइरहेको भेटिएको छ ।
पेट्रोल बिक्री अनुमति नै नलिई बजार मूल्यभन्दा महँगोमा विभिन्न पसलमा पेट्रोल बिक्री भएको चितवन प्रहरीले पत्ता लगाएपछि कालोबजारी गर्नेहरुको धन्दा चौपट भएको हो । चितवन प्रहरीले २४ गते बुधबार विभिन्न पसलबाट पेट्रोल बिक्री गर्नेहरु पक्राउ गरी अनुसन्धान अगाडि बढाएको छ । पेट्रोलमा कालोबजारीमा संलग्न भएको आरोपमा ६ जनालाई बिहीबार प्रहरीद्वारा जिल्ला प्रशासनमा म्याद थप गरिएको छ ।
अनाधिकृत पेट्रोल बिक्रीको आरोपमा भनपा ६ पीपलचोकबाट अयोध्यापुरी गाविस वडा नं.७ घर भएका वर्ष ३५ को धनुधर पहारी र खैरहनी गाविस वडा नं. ५ घर भएका वर्ष ३३ का खेमराज अर्याललाई प्रहरीले पक्राउ गरेको थियो । पहारीको ब्रदर्श पुस्तक पसलबाट १ वटा कालो प्लाष्टिकको ड्रममा राखेको २९ लिटर र ६ वटा मिनिरल वाटरको बोतलमा हाली राखेको ६ लिटर पेट्रोल बरामद गरेको प्रहरीले जनाएको छ ।
त्यस्तै खेमराज अर्यालको किराना पसलबाट एक वटा कालो प्लाष्टिकको जर्किनमा राखेको ६ लिटर, १६ वटा मिनिरल वाटरको बोतलमा हाली राखेको १६ लिटर पेट्रोल प्रहरीले बरामद गरेको छ ।
बजारमा पेट्रोलको अभाव भई रहेको अवस्थामा पेट्रोल विक्री वितरण गर्न अनुमति नै नलिई पेट्रोल राखी महङ्गो मूल्यमा बिक्री वितरण गरी कालो बजार गर्नेलाई पक्राउ गरी कारबाही अगाडि बढाउने प्रहरीले जनाएको छ ।
त्यस्तै प्रहरीले भरतपुर नगरपालिका वडा नं.७ तेह्रसालचोकबाट वर्ष २९ को नहिम मिया र पर्वत घर भई हाल जिल्ला चितवन भरतपुर ७ तेह्रसालचोक बस्ने वर्ष २५ की बिपना कुँवरलाई पक्राउ गरेको छ ।
मियाको कौशर किराना पसलबाट ३ वटा प्लाष्टिकको ड्रममा राखेको १५० लिटर र बिपना कुँवरको घुम्ती पसलबाट २ वटा कालो प्लाष्टिकको जर्किनमा राखेको २५ लिटर साथै १६ वटा मिनिरल वाटरको बोतलमा हाली राखेको १६ लिटर गरी कुल ४१ लिटर पेट्रोल बरामद गरेको प्रहरी निरीक्षक जीवलाल चुदालीले बताए ।
यस्तै, भरतपुर ११ बस्ने वर्ष ३१ को सुवास ज्ञवालीको मदिरा पसलबाट ६५ लिटर पेट्रोल प्रहरीले बरामद गरेको छ । त्यस्तै भरतपुर ६ बस्ने राजेश कुमार श्रेष्ठको किराना पसलबाट २७ लिटर पेट्रोल बरामद गरिएको प्रहरीले जनाएको छ ।
कालो बजार तथा केही सामाजिक अपराध र सजाय ऐन २०३२ अन्तर्गत मुद्दा दर्ता गरी पक्राउ परेका व्यक्तिहरुलाई थप अनुसन्धानका लागि हिजो बिहीबार जिल्ला प्रशासन कार्यालय चितवनबाट अनुमति लिई अनुसन्धान प्रक्रिया अगाडि बढाइएको प्रहरी निरीक्षक चुदालीले बताए ।
पेट्रोल पम्पमा घण्टौं लाम बस्दा पनि पेट्रोल नपाइने तर किराना पसलमा महँगोमा पाइने गुनासो नागरिकबाट भएपछि चितवन प्रहरीले यस सम्बन्धमा सक्रियता देखाएको प्रहरी प्रवक्ता डीएसपी सञ्जयबहादुर राउतले बताए ।