कविलास । कविलास गाविसमा गाविस सचिव प्रद्युम्नकुमार खड्काको संयोजकत्वमा स्थानीयस्तरको स्थानीय विपद् व्यवस्थापन समिति गठन भएको छ । गाविस भवनमा मंगलबार बसेको सर्वपक्षीय भेलाले सचिवको अध्यक्षतामा १९ सदस्यीय समिति गठन गरेको हो ।
समितिले विपद् व्यवस्थापनको योजना बनाउने, प्रभावित क्षेत्रमा उद्धार तथा राहतको व्यवस्था गर्ने, जिल्ला विपद् व्यवस्थापन समितिसँग समन्वय गर्ने जनाइएको छ । १ हजार ५८ घरधुरी रहेको कविलास गाविसमा रहेका खहरे खोलाले वर्षेनि सताउँदै आएको छ ।
०६० सालमा आएको बाढीले ५८ घरधुरी बगाएको थियो भने १८ जना बेपत्ता भएका थिए । त्यस्तै, ०६३ सालमा आएको बाढीले ३ वटा घर बगाएको थियो । दुई जनाको पहिरोमा पुरिएर मृत्यु भएको थियो । कविलास गाविसस्थित खोला, वारलाड्ड, कुसुमबस्ती मुख्य बाढी पहिरो प्रभावित क्षेत्र हुन् ।
जिल्ला विकास समिति चितवनका प्रकोप सम्पर्क व्यक्ति बलराम लुइँटेलले चितवनका ८ वटा गाविसमा स्थानीय विपद् व्यवस्थापन समिति गठन भइसकेको बताउनुभयो । उहाँले समितिले उद्धार गर्न कोष स्थापना तथा परिचालन, तालिम आदि कार्य गर्न समितिहरु क्रियाशील रहने बताउनुभयो ।
Discussion about this post