वन्यजन्तु संरक्षण गर्न फुटबल प्रतियोगिता

सौराहा । आन्तरिक पर्यटन प्रवद्र्धन तथा दुर्लभ वन्यजन्तु संरक्षणका लागि सौराहामा फुटबल प्रतियोगिता हुने भएको छ ।
सौराहा युवा समाजको आयोजनामा पहिलोपटक गैंडाकप आमन्त्रित खुला जिल्ला स्तरीय नकआउट फुटबल प्रतियोगिता हुन लागेको हो । सौराहा युवा समाज सौराहाले बिहीबार पत्रकार सम्मेलन गरी यही वैशाख २५ गतेदेखि प्रतियोगिता आयोजना गर्ने जनाएको छ । १३ टिमको सहभागिता रहने खेलमा बुटवलदेखि हेटौँडासम्मका क्लबले सहभागिता जनाउने सौराहा युवा समाजका अध्यक्ष शिरलाल परियारले बताए ।
प्रतियोगितामा नारायणगढ, भरतपुर, माडी, मुग्लीन, हेटौंडा, वीरेन्द्रनगर, कावासोती, रामपुर, बुटवल, गैँडाकोट र आयोजक दुई टिम भिड्ने छन् । गैँडाकप प्रथम आमन्त्रित खुला जिल्ला स्तरीय नकआउट फुटबल खेलले युवाप्रति एक सिगें गैँडा बचाउनुपर्छ भन्ने सन्देश प्रवाह गर्ने परियारको भनाइ छ ।
जेठ पाँच गतेसम्म सञ्चालन हुने प्रतियोगिता आयोजना गर्न सात लाख ६१ हजार बढी खर्च अनुमान गरिएको खेलका संयोजक जेके लामाले बताए । बाघमारा मध्यवर्ती सामुदायिक वनको चौरमा आयोजना गर्न लागिएको फुटबल प्रतियोगितामा प्रथम हुनेले एक लाख ११ हजार १११, द्वितीय हुनेले ५५ हजार ५५ रूपैयाँ पुरस्कार पाउने आयोजकले जनाएको छ ।