लण्डनबाट फर्केर गाईपालन

दिपेन्द्र अधिकारी
भण्डारा । वर्तमान पुस्ताका लागि पैसा कमाउनका लागि विदेश पहिलो रोजाइ बनेको छ । विदेशमा केही वर्ष विताएर घर फर्किएका भण्डाराका तीन नेपाली युवाले भने विदेशी मोह त्यागेर नेपालमै व्यवसायिक गाईपालन थालेका छन् ।
स्वदेशमै मेहेनत गरे के हुँदैन र भन्ने थुप्रै सफल किसानहरुको उदाहरणजस्तै बनेका छन् भण्डाराका तीनजना युवाहरु । ती कर्मठ युवा हुन्– भण्डारा ९ डडुवा निवासी प्रदीपराज पाण्डे, रविन्द्र ढकाल र सञ्जय ढकाल । पाण्डे ११ वर्ष लण्डन बसेर फर्किएका हुन् । २० वर्षको उमेरमा लण्डन सहर छिरेका यी नै पाण्डे अहिले भण्डारामा आफ्नै ज्वाइसँग मिलेर गाईपालन गरी बसेका छन् । उनका ज्वाइँ रविन्द्र ढकाल जर्मन बसेर आएका हुन् भने अर्का ज्वाइँ सञ्जय दुबइमा पसिना बगाएर फर्किएका हुन् ।
विदेशमा गरिने मिहिनेत स्वदेशमा गर्न सके यही जीवनस्तर राम्रो हुने उनीहरुको बुझाइ छ । हालै तीनजना युवा एउटा गाईफार्म स्थापना गरेर त्यसै पेसामा रमाइरहेका छन् । उर्जाशील केही समय विदेशमा बिताए पनि यी तीन यूवा अहिले गाईपालनमा जमेर लागेका छन् ।
हाल ३३ वर्षका पाण्डे २ वर्ष अघि घर फर्किएका थिए । घर फर्किएपछि गाईपालन गर्ने योजना बनाएका उनले बाँकी एक वर्ष के कसरी गाईपालन गर्न सकिन्छ भन्ने विषयमा घरपरिवार, अन्य व्यवसायी र प्राविधिकहरुसँग सरसल्लाह लिए ।
‘संचारमाध्यममा पनि गाईपालनले राम्रो भएको धेरैको कथा सुनेपछि यसैतर्फ लाग्न थप प्रेरित ग¥यो’, पाण्डेले भने, ‘घरपरिवार मिलेर राम्ररी यस व्यवसायलाई अघि बढाइरहेका छौँ ।’
सुरूमा ४ वटा गाई पालेका उनीहरुको गोठमा कुनै समय ३५ गाई थिए । हाल २४ वटा गाई र बाच्छी रहेका छन् । जसमध्ये तीनवटाले मात्र दूध दिन्छ । गोठमा एउटा भैँसी पनि रहेको छ । पालिएको गाईको जात जर्सी र होलेस्टाइन क्रस रहेको छ ।
गाईपालक पाण्डेले भने, ‘पशु प्राविधिकहरुको सहज उपलब्धता नहुनाले कठिनाइ हुने गरेको छ ।’ गाईपालन व्यवसायलाई थप प्रभावकारी बनाउन उनीहरुले २ बिघा जमिन भाडामा लिई घाँसखेतीसमेत गरेका छन् । भावी योजनाबारे पाण्डेले भने, ‘मिल्यो भने अर्को वर्ष हामी आफै डेरीसमेत स्थापना गर्ने सोचमा छौंँ ।’ पशुपालनसम्बन्धी सरसल्लाह लिन जाँदा जिल्ला पशु कार्यालयबाट आवश्यक सहयोग नपाएको उनीहरुको गुनासो छ ।