निर्वाचनबाट एमाओवादीको नयाँ नेतृत्व

धादिङ । एकीकृत नेकपा माओवादी धादिङले पहिलो पटक निर्वाचन प्रकृयाबाट जिल्ला कार्यसमिति र केन्द्रीय प्रतिनिधिहरुको चयन गरेको छ । पार्टीको संशोधित विधान अनुसार ३८ सदस्यीय जिल्ला कमिटीका लागि ९३ जनाले र १८ जना केन्द्रीय प्रतिनिधिका लागि ४१ जनाले प्रतिस्पर्धा गरेका थिए ।
सहमतिमा नेतृत्व चयन तथा केन्द्रीय प्रतिनिधि चयन गर्ने प्रयास असफल भएपछि  शनिवार दिउँसो पार्टी नेतृत्व निर्वाचनबाट जिल्ला सदस्य र महाधिवेशन प्रतिनिधि चयन गर्ने टुङ्गोमा पुगेको थियो ।
शनिबार साँझ सम्पन्न भएको निर्वाचनमा जिल्लाभरबाट ३२७ प्रतिनिधि सहभागी भएका थिए । निर्वाचन सम्पन्न भएलगत्तै राति नै मतगणना सम्पन्न गरी परिणाम सार्वजनिक गरेको भएपनि मतगणनामा धाँधली भएको भन्दै विवाद सुरु भएपछि आइतबार विहान पुनः मतगणना गरी दिउँसोमात्र परिणाम सार्वजनिक गरिएको थियो । निर्वाचन समितिले आइतबार पत्रकार सम्मेलन गरी घोषणा गरेको नतिजा अनुसार केन्द्रीय प्रतिनिधिमा रामबहादुर भण्डारी, पुष्पविक्रम मल्ल, राजु नेपाल, वेदनिधि अधिकारी, मनराज थापा, विजय बुर्लाकोटी, वीरबहादुर तामाङ, दीपक विश्वकर्मा, शंकर अधिकारी, सीताराम कोइराला, चन्द्रबहादुर सिलवाल, सुदर्शन खतिवडा चयन भएका छन ।
यसैगरी दुर्लभकुमार तामाङ, सिर्जना रिजाल, दीपक लामिछाने, चक्रबहादुर भण्डारी, अर्जुन नगरकोटी र कमल सापकोटा पनि केन्द्रीय प्रतिनिधिमा चयन भएको बताइएको छ ।