पूर्वराजा ज्ञानेन्द्रको चितवन भ्रमण

पूर्वराजा ज्ञानेन्द्र शाह दुईदिने चितवन भ्रमण गरी फर्किएका छन् । शुक्रबार र शनिबार चितवनका धार्मिक क्षेत्र तथा जनतासँग भेटघाटमा व्यस्त रहेर उनी फर्किएका हुन् । उनलाई चितवनका हजारौँ जनताले श्रद्धापूर्वक स्वागत तथा सम्मान गरेका थिए । उनले शुक्रबार रत्ननगर, खोलेसिमल, जुटपानी र पदमपुरमा गुम्बा तथा मन्दिरको दर्शनका क्रममा शुभेच्छुकहरुसँग भेटघाट गरेका थिए । भ्रमणका क्रममा पूर्वराजाले ‘जनताले चाहे राजसंस्था फर्कन सक्ने’ संकेत गरेका थिए । देशमा बढ्दै गएको अन्योल र अराजकता कायमै रहे र जनताले आफ्नो भूमिका चाहे राजसंस्था फर्कन सक्ने उनले प्रस्ट पारेका थिए । पूर्वराजाले सबै जातजाति, वर्ग, सम्प्रदायको हित तथा संरक्षण हुने संविधान बनोस् भन्ने शुभेच्छासमेत व्यक्त गरे । मुलुकमा शान्ति र अमनचयन स्थापना गर्न दलहरु असफल भएकोमा उनले चिन्ता प्रकट गरेका थिए । जनताको खुसीका लागि आफूले ‘राजगद्दी’ छाडे पनि फेरि जनताले चाहे देशलाई निकास दिन तयार रहेको उल्लेख गरेका थिए ।
पृथ्वीनारायण शाह स्मृति प्रतिष्ठान नेपालले नारायणी कला मन्दिरमा आयोजना गरेको ‘राष्ट्र, राष्ट्रियता र आजको सन्दर्भ’ विषयक विचार गोष्ठीमा पनि ज्ञानेन्द्रले जनताको चाहनाअनुरुप आफू काम गर्न तयार रहेको दोहो¥याएका थिए । एउटा संयोग नै मान्नुपर्छ, आठौँ लोकतन्त्र दिवसकै भोलिपल्ट पूर्वराजाले धार्मिक क्षेत्रहरुको भ्रमणका नाममा जनतासँग जसरी प्रस्तुत भए, त्यो उनको ठाउँमा जायज नै मान्नुपर्ने हुन्छ । किनभने, जनताको चाहनाको पछाडि कोही कसैको केही लाग्नेवाला छैन भन्ने दृष्टान्त पटकपटक देखिइसकेको छ । हिजो ‘प्रतिगमन मुर्दावाद’को नारा लगाउँदै उन्नाइस दिने आन्दोलनमा होमिएका दलका कायकर्ताहरु स्वयम् धनुष्टङ्कार शैलीमा पूर्वराजाको स्वागतमा देखिन्छन् भने जनताले ‘राजा आऊ देश बचाऊ’को नारा लगाउनु अन्यथा मान्नुपर्दैन । कम से कम पूर्वराजाले ‘पुर्खाले खडा गरेको, वीर–वीरंगनाहरुले जोगाएको र विद्वान्, चिन्तक र दूरदर्शी सर्जकहरुले सँगालेको नेपाल अटल, अखण्ड र अविभाज्य रहिरहोस्’ भन्ने कामना त गरिरहेका छन् ।
आज नागरिकसरहका पूर्वराजासँग जनताले शान्ति सुरक्षा, महँगी बढेको, संक्रमणकाल लम्बिएको, दण्डहीनताले सीमा नाघेको र देश दिशाहीन भएको गुनासो पोखेर राजसंस्थाको अभाव खट्किएको सन्देश दिइरहेका छन् । पूजाआजाका नाममा जनताको राय बुझ्ने, अभिनन्दन ग्रहण गर्ने र राष्ट्रिय एकता र अखण्डताको नाम दिएर जनतालाई आकर्षित गर्ने अभियानमा पूर्वराजा सक्रिय भएको घामझैँ छर्लङ्ग छ । मुलुकमा जनआन्दोलनपश्चात् राजतन्त्रको विधिवत् अन्त्य गरी गणतन्त्र घोषणा भइसकेको स्थिति छ । तर, दलप्रति जनताको कतिसम्म वितृष्णा रहेछ भन्ने ज्ञानेन्द्रको भ्रमणमा जनताले देखाएको शुभेच्छाबाटै स्पष्ट भएको छ । उनले  अनपढले पनि सजिलै बुझ्ने भाषा प्रयोग गरी ‘जनताले चाहे राजसंस्था फर्किन सक्ने’ उद्घोष गरे । यो अभिव्यक्ति गणतन्त्र नेपालका नेता भनिनेहरुका लागि खुल्ला चुनौती हो । जनताले चाहे देशमा आँधीहुरी आउन सक्छ, विद्रोह–आन्दोलन हुनसक्छ र, ज्ञानेन्द्रहरुको पुनरागमन पनि हुनसक्छ । यसतर्फ दलहरुले गम्भीरतापूर्वक मनन् गर्नु जरूरी छ ।