गाउँलेले लखेट्दा घाइते भयो गैंडा

कसरा । बाटो बिराएर गाउँ छिरेको गैंडालाई चितवन निकुञ्जले घाइते अवस्थामा उद्धार गरेर निकुञ्जकै इचर्नी क्षेत्रमा छाडेको छ । वन्यजन्तुसँग सम्बन्धित विज्ञको भनाइलाई अटेर गरेर गाउँलेले लखेट्दा गैंडा घाइते भएको निकुञ्जले जानकारी दिएको छ । यस्ता कृयाकलाप नदोहो¥याउन निकुञ्जले स्थानीयसँग अपिल गरेको छ ।
चितवन निकुञ्ज कार्यालयले मंगलबार निकालेको विज्ञप्तिमा गाउँ छिरेका जंगली जनावरका बारेमा समयमै निकुञ्ज र वन कार्यालयमा जानकारी दिन भनिएको छ । जंगली जनावरको स्वभावसँग परिचित भएका व्यक्तिको टोलीले उद्धार गर्नेबाहेक अन्यले वन्यजन्तुलाई लखेट्ने भगाउने नगर्न निकुञ्जले अनुरोध गरेको छ ।
पर्सा वन्यजन्तु आरक्षबाट वैशाख तीन गते मकवानपुर जिल्लाको छतिवनमा पुगेको अन्दाजी १२ वर्षको भाले गैंडा गाँउलेले आफूखुसी लखेटेर जंगलतर्फ भगाउन खोज्दा गम्भीर घाइते भएको निकुञ्जले जनाएको छ । गैंडाको चारवटै खुट्टाका पैतालामा नराम्ररी चोट लागेको छ
तीन गते गाउँ पसेको गैंडालाई प्राविधिकहरुको टोलीले नौ गते बिहानमात्रै उद्धार गर्न सकेको थियो । योबीचमा गैंडा हेर्न बिहानदेखि बेलुकासम्म गाउँलेको भीड लागेको थियो । गैंडालाई ढुंगा र आगोको मुस्लोले हान्ने गरेको निकुञ्जका अधिकारीहरुले बताएका छन् । गैंडालाई उद्धार गर्न पर्सा वन्यजन्तु आरक्ष, चितवन निकुञ्ज र राष्टिय प्रकृति संरक्षण कोषको प्राविधिक टोली र प्रहरीले समेत सम्झाउने बुझाउने गर्दा पनि गाउँलेले आफ्नै तरिकाले गैंडा लखेटेको निकुञ्जले विज्ञप्तिमा जनाएको छ । खोलाको ढुंगे बगरमा लखेटेका कारण खुट्टाको पैतालामा चोट लागेको हो ।
नेपाल प्रहरीसहितको सुरक्षा टोलीमा गएको निकुञ्जका प्रमुख संरक्षण अधिकृत कमलजंग कुँवर, मकवानपुरका जिल्ला वन अधिकृत र निकुञ्जका वरिष्ठ पशु चिकित्सक कमल गैरेको टोलीले गैंडालाई सोमबार बिहान हर्नामडिमा डार्ट गरेर बेहोस् बनाएको थियो । त्यसपछि खोरमा राखेर गैंडालाई चितवन ल्याइएको थियो ।
चितवन निकुञ्जको सौराहानजिक जनकौली मध्यवर्ती सामुदायिक वनमा सोमबार दिउँसो दुई बजे सो गैंडालाई छाडिएको थियो । गैंडा विस्तारै हिँडेर इचनी टापुतर्फ लागेको निकुञ्जले जनाएको छ । घाइते गैंडाको प्राविििधकहरुले नियमित अनुगमन गर्ने छन् ।
बाटो बिराएर गाउँ पसेका जंगली जनावरहरु कुनै अवरोध नभएमा विस्तारै जंगल नै फर्कन्छन् । तर गाउँलेले होहल्ला गर्दा वन्यजन्तु रुमलिने मात्रै होइन मान्छेमाथि नै आक्रमण गर्ने निकुञ्जका सहायक संरक्षण अधिकृत टीकाराम पौडेलले जानकारी दिए ।
त्यसैले जंगली जनावर देख्नासाथ आरक्ष, निकुञ्ज, वन, प्रहरी, मध्यवर्ती कार्यालय जस्ता सम्बन्धित निकायमा खवर गर्न र उद्धारमा खटिने प्राविधिकहरुलाई सहयोग गर्न पौडेलले सर्वसाधरणलाई अपिल गरेका छन् । आफूखुसी गर्नाले जनावरका साथै स्थानीय पनि जोखिममा पर्ने उनले बताए ।
क्याप्सन  ः हर्नामडिमा गैंडालाई आगो बालेर घपाउँदै स्थानीय ।