रेशमखेतीमा नमुना बन्दै माडी

माडी । जिल्लाको माडी क्षेत्र रेशमपालनको नमुनाको रुपमा अगाडि आउन थालेको छ । यस क्षेत्रका किसानहरुले २०५० सालदेखि रेशमखेतीलाई व्यवसायिक रुपमा अँगाल्दै आएका छन् ।
माडीको कल्याणपुर अध्योध्यापुरी र बघौडा गाविसका करिब ५५ घरका किसानले आफ्नो भएको केही जमिनमा किम्बुखेती गरी रेशम कीरापालन गरेर राम्रो आमदानी गरेका छन् । अन्य खेती बालीलाई जस्तो जोतखन गर्नु नपर्ने कम लगानीमा अधिक आम्दानी हुने र उत्पादित कोकन घरबाट नै बिक्री हुने भएकाले पनि कृषकको आकर्षण यसतर्फ बढेको हो ।
माडीका किसानहरुले रेशम कीराको कोकन बिक्री गर्न थालेका छन् । उनीहरुले चैत महिनामा पालेका रेशम कीराको कोकन आइतबार बिक्री गरेका हुन् ।
पुस र माघ महिनामा कम तापक्रम हुने र साउन भदौमा बढी तापक्रम हुने हुँदा यी महिनामा रेशमको उत्पादन कम हुन्छ भने चैत र वैशाख रेशम उत्पादनको लागि राम्रो मौसम मानिन्छ ।
माडीको कल्याणपुर ३ र ७ सेउलीबास अयोध्यापुरी गाविसको देवेन्द्रपुर, इन्द्रबस्ती र बघौडा गाविसको ढिकुरबारीका कृषकहरुले रेशमको खेती व्यवसायिक खेती गर्दै आएका छन् ।
केही वर्ष अगाडिसम्म उत्पादित कोकन आफूहरुले नै बोकेर किम्बु नर्सरी व्यवस्थापन केन्द्र भण्डारा चितवनसम्म लैजानुपर्ने समस्या भए पनि अहिले भने उद्यमीले नै घरबाट खरिद गरेर लाने गरेका छन् । उद्यमीले घरबाट नै उत्पादित रेशमको कोकन खरिद गरिदिँदा सहज भएको स्थानीय किसान खिलबहादुर गुरूङले बताए ।
कृषकहरुले राम्रो कोकन उत्पादन गरेदेखि आफूले सधैभरि खरिद गर्ने र किसानलाई मर्का नपर्ने गरी मूल्य दिने धादिङ बैरेनीका उद्यमी महेश अधिकारीले बताए । आफूहरुले बजारबाट खरिद गर्ने दैनिक उपभोग्य वस्तुको मूल्य दिनप्रतिदिन  बढेको र आफूले दिनरात गरेर उत्पादन गरेको रेशम कीराको कोकनको मूल्य भने नबढेकोप्रति भने किसानले गुनासो
गरेका छन् ।
सरकारको यसतर्फ ध्यान नदिएको कल्याणपुरका किसान यमनाथ पौडेलले बताए । चैतमा मात्र उत्पादन भएको एक हजार ५०० केजी कोकन आइतबार उद्यमी महेश पौडेलले खरिद गरी आफ्नो कपडा उद्योगमा लगेका छन् ।
महिना दिनमा नै ८५ केजी कोकनको ३६ हजार रूपैयाँ कमाएकोमा मनकुमारी शाहले खुसी व्यक्त गरिन् । किसानहरुले रेशम कीरा पालनमा चासो दिएर लागेदेखि ५० प्रतिशत बिरूवा र कीरा खरिदमा सहयोग गर्ने र कृषकलाई समय समयमा तालिमको समेत व्यवस्था गर्ने किम्बु नर्सरी व्यवस्थापन केन्द्र भण्डारा चितवनका प्रमुख मेघनाथ तिमल्सिनाले बताए ।