चित्रबाट अक्षर चिन्ने विधि प्रभावकारी

भरतपुर । चितवनमा सञ्चालित साक्षरता अभियानमा चित्रबाट अक्षर चिन्ने विधि प्रभावकारी देखिएको छ ।
सबैलाई साक्षर बनाउने अभियानमा यहाँ ‘चित्र सन्देश’ मार्फत गरिएको शिक्षण विधिबाट सिकाइ प्रभावकारी भएको जिल्ला शिक्षा अधिकारी रमाकान्त शर्माले बताउनुभयो ।
सुरूमा घरको चित्र देखाएर वरिपरिका गतिविधि स्मरण गराउँदै समूहमा छलफल गराइने विधि चित्र सन्देश हो । चित्रको आधारमा देखिएका विषय सजिलै खोट््याउन सक्ने भएकाले सिक्न पनि सजिलो हुने गरेको शर्माले बताउनुभयो ।
साक्षरता कक्षामा सहभागी महिला या पुरूषका लागि नयाँ गोरेटो पुस्तकमार्फत चित्र सन्देशलाई जोड दिइएको जिल्ला शिक्षा कार्यालय चितवनले जनाएको छ । आँखाको कमजोरीलाई पनि चित्र देखाए पनि सजिलै बुझ्ने अनुगमनमा समेत पाइएको कार्यालयले जनाएको छ ।
सुरुमा ‘क’ बाट नपढाई ‘घ’ बाट पढाउनुको उद्देश्य पनि यही रहेको उहाँले बताउनुभयो । सरसफाइको पाठ पढाउँदा सरसफाइकै दृश्य देखाउँदा उनीहरूको दिमागमा बस्ने सहायक जिल्ला शिक्षा अधिकारी भूमि सुवेदीले बताउनुभयो ।
चितवनमा निरक्षर रहेका ४४ हजारलाई साक्षर बनाउने लक्ष्यसहित साक्षरता कक्षाको सञ्चालन गरिएको छ । सन् २०१५ भित्र चितवनलाई साक्षर जिल्ला घोषणा गर्ने लक्ष्यसहित शिक्षा कार्यालय लागिपरेको छ । चितवनमा यस वर्ष एक हजार ७२९ कक्षा सञ्चालन गरिएको छ ।
२४ गाविस, रत्ननगरका ५ र भरतपुरका १२ वडालाई साक्षर बनाउने लक्ष्य यो वर्षको छ । अघिल्लो वर्ष चितवनमा सञ्चालन गरिएको साक्षरता कक्षाबाट १३ हजार लाभान्वित भएका थिए । चितवनमा १६ देखि ६० वर्षसम्मका मानिस साढे तीन लाख छन् ।  शिक्षा कार्यालयले दिएको तथ्याङ्कमा १७ प्रतिशत निरक्षर रहेको तथ्याङ्क छ ।