फुजेल काण्डको बहस सुरु

दिपेन्द्र अधिकारी
भरतपुर । कृष्णप्रसाद अधिकारीको हत्या प्रकरणका अभियुक्तसँग अदालतले बुधबार बयान सकेपछि तत्कालै बहस सुरु भएको छ । दिउँसो २ बजेबाट सुरु भएको बहस बेलुकीसम्म चलेको थियो । बहसमा जाहेरवाला र प्रतिवादीको तर्फबाट ३ दर्जन बढी अधिवक्ताले भाग लिएका छन् । तीन दिनसम्म बहसले समय लिने देखिन्छ ।
चितवनलगायत काठमाडौँ, हेटौंडा र परासीका ३८ जना कानुन व्यवसायीले अभियुक्तको पक्षबाट थुनछेक आदेशको बहसमा सहभागी हुन नाम दर्ता गराएका छन् । काठमाडौंबाट वरिष्ठ अधिवक्ता चण्डेश्वर श्रेष्ठ, नेपाल बार एसोसिएसनका पूर्वमहासचिव रमनकुमार श्रेष्ठलगायतका अधिवक्ता चितवन आएका छन् । उजुरीकर्ताको तर्फबाट सरकारी वकिल एकनारायण लम्सालले बहस गर्ने छन् ।
धेरै अधिवक्ताले बहस गर्ने भएपछि चितवन जिल्ला अदालतका न्यायाधीश विनोदमोहन आचार्यले अग्रज अधिवक्तालाई बहस गर्नेको संख्या कम गर्न आग्रह गर्नुभएको थियो । अदालतमा अन्य मुद्दा पनि भएकाले समयमा पाबन्दी ख्याल गर्न उहाँले आग्रह गर्नुभयो ।
३८ जना अधिवक्ता, अभियुक्तका आफन्त र पत्रकारको उपस्थितिका कारण इजलास खचाखच भएको थियो । यति धेरै संख्यामा वकालत नामा गराउने अधिवक्ता भएपनि पहिलो घटना नभएको अदालतका नासु जयनारायण आचार्यले बताउनुभयो ।
बयानका क्रममा अभियुक्त छविलालले पोलिग्राफ मेशिन प्रयोगबारे आफूलाई प्रस्ट जानकारी नदिएकाले आफू परीक्षण गर्न तयार नभएको बताउनुभएको छ । गत आइतबार हत्या अभियोगमा १३ जनाविरूद्ध चितवन जिल्ला अदालतमा मुद्दा दायर भएको थियो । अभियुक्तहरु छविलाल पौडेल र भीमसेन पौडेलको बयान दिउँसो १ बजेमात्र सकिएको थियो । बयान र बहसका क्रममा अभियुक्तको आफन्तको बाक्लो उपस्थिति रहेको थियो ।
बुधबार दिउँसो बयान जारी रहँदा अभियुक्त पक्षले जिल्ला प्रशासनमा धर्ना दिनुका साथै अदालत परिसरमा नाराबाजी गरेका थिए । सामान्यत अदालतमा मुद्दा दर्ता भएपनि त्यस मुद्दाको छिनाफानो नलागेसम्म मुद्दाको विषयमा टिकाटिप्पणी, अभिव्यक्ति केही पनि दिन पाइँदैन । त्यसो भएमा अदालतको अवहेलना गरेको ठहर्छ ।
कृष्णप्रसादलाई माओवादीले चितवन बकुलहर चोकमा गोली हानेर हत्या गरेको थियो । विसं. २०६१ साल जेठ २४ मा अधिकारीको हत्या भएको थियो । सो हत्या प्रकरणविरूद्ध कृष्णका आफन्तले घटना भएलगत्तै र घटनाको १८ महिनापछि गरेर प्रहरीमा दुई पटक उजुरी दिएका थिए ।