अलपत्र नेपालीको उद्धार

म्यानपावर कम्पनीले लाखौँ कमाउने प्रलोभन देखाएर वैदेशिक रोजगारीमा जाने नेपाली कामदारहरुलाई अलपत्र पार्ने गरेका छन् । यसरी म्यानपावर कम्पनी र एजेन्टमार्फत् लेबनान पु¥याइएका ३७ महिलासहित ३९ जना नेपाली कामदारलार्ई भर्खरै उद्धार गरिएको थियो । उद्धार गरिएका महिलाहरुले आफूहरुलाई तलब नदिइएको, शारीरिक यातना र श्रम शोषण गरिएको जनाएका छन् । घरेलु कामदारका रुपमा लेबनान पुगेका महिलाहरुमाथि शोषण भएपछि भागेर अन्य नेपालीहरुको शरणमा पुगेपछि सरकार, इजिप्टस्थित नेपाली दूतावास तथा विश्व आप्रवासी संगठनको प्रयासमा उद्धार गरिएको थियो । पीडित महिलाहरुलाई वैदेशिक रोजगारबाट फर्किएका महिलाहरुको समूहद्वारा सञ्चालित ‘पौरखी’ संस्थाले जिम्मा लिएर पुनसर््थापना गर्ने भएको छ ।
लेबनानमा अलपत्र परेका महिलाहरुको अवस्थाबाट नेपाली कामदारहरुको अवस्थाबारे प्रष्ट हुन सकिन्छ । यसरी प्रलोभनमा परेका हजारौँ नेपालीहरुले विभिन्न मुलुकहरुमा कष्टपूर्वक निकृष्ट काम गर्न बाध्य भएका छन् । कतिपय महिलाहरुमाथि यौन शोषण गरिएका खबरहरु बेलाबेलामा सुनिने गरेका छन् । लेबनानमा धेरै महिला कामदारको अवस्था दयनीय रहेको पीडित महिलाहरुले बताएका छन् । कुटपिट गर्ने, मानसिक तनाव दिने, राम्रोसँग खान पनि नदिने, श्रमको मूल्य नदिने कारण अधिकांश भागेर अवैधानिक भएर बस्ने गरेको विश्व आप्रवासी संगठनले जनाएको छ । नेपालबाट संस्थागत रुपमा घरेलु कामदार पठाउने प्रावधान छैन ।
सरकारले संस्थागत रुपमा घरेलु कामदार पठाउन बन्द गरे पनि हजारौँ महिला विदेशमा रहेको वैदेशिक रोजगार व्यवसायी संघले प्रष्ट पारेको छ । तर, विभिन्न एजेन्ट तथा म्यानपावर कम्पनीको प्रलोभनमा परेर दिनहुँजसो घरेलु कामदारका रुपमा विदेश जाने महिलाहरुको संख्या बढिरहेको छ । दुई साताअघिमात्र कम्पनीको मालिक भागेपछि मलेसियामा ८५ कामदार अलपत्र परेका थिए । मालिकले नै पासपोर्ट लिएर भागेपछि खोटाङको सुरक्षित आप्रवासन परियोजनाले उनीहरुलाई उद्धार गरेको थियो । अलपत्र अवस्थामा उद्धार गरिएकामा खोटाङ, ओखलढुंगा, भोजपुर, सिराहा, संखुवासभा, इलाम, रौतहट, सर्लाही, बारा, पर्सा, महोत्तरी, धनुषा र मकवानपुर जिल्लाका थिए । उद्धार गरिएकालाई काठमाडौँस्थित प्रवासी नेपाली समन्वय समितिको केन्द्रमा राखिएको थियो ।
मकाउमा राम्रो कमाई हुने, सुरक्षा र सुविधाको प्रलोभन देखाएर ठगी हुने गरेको छ । करिव २२ सय नेपालीहरु मकाउमा गएको हङकङस्थित महावाणिज्य दूतावासको तथ्यांकमा छ । मकाउमा नेपालीहरुले दुःख पाएको, भनेबमोजिमको काम नपाएको र म्यानपावरबाट ठगिएका गुनासाहरु आइरहेका छन् । मकाउमा कामदार पठाउन दर्जनबढी म्यानपावर कम्पनी सक्रिय रहेका छन् । केही महिनाअघि मकाउमा ३१ जना कामदारलाई विचल्ली अवस्थामा राखिएको भन्दै उद्धार गरिदिन परराष्ट्र मन्त्रालयमा निवेदन परेको थियो । कराँतेका राष्ट्रिय प्रशिक्षक टीकारामले अन्तर्राष्ट्रिय खेलकुदमा सहभागी गराउने भन्दै कामदारहरुलाई विचल्ली बनाएका थिए । यस्ता ठगीका श्रृंखला अन्त्य गर्न सरकारले दोषी देखिएका म्यानपावर कम्पनीलाई कारबाही गर्नुपर्छ ।