अधिकारी हत्या प्रकरणका अभियुक्तहरुले भने– ‘अंश दिलाउँदा हत्या आरोप लाग्यो’

भरतपुर । कृष्ण अधिकारीको हत्याको अभियोग लागे पनि गिरफ्तार नभएका व्यक्तिहरु र उनीहरुका आफन्तहरुले सोमबार भरतपुरमा पत्रकार सम्मेलन आयोजना गरेर सो हत्या प्रकरणसँग जोडिएका सवै पाटो सार्वजनिक गर्न माग गरेका छन् । अधिकारीलाई कसले किन मारेको हो माओवादीले सार्वजनिक गर्नुपर्ने बेला आएको उनीहरुले बताए ।
आफूहरुलाई फसाएर वास्तविक अपराधीलाई उम्क्याउने षडयन्त्र भएको उनीहरुको आरोप छ । केही समयअघि चितवन आएका माओवादी नेता बाबुराम भट्टराईले सत्य निरूपण तथा मेलमिलाप आयोग नबन्दासम्म कुनै खास घटनाका बारेमा मात्रै पार्टीले अनुसन्धान गर्ने र त्यसका बारेमा जानकारी सार्वजनिक गर्ने नीति नभएको बताएका थिए ।
सशस्त्र संघर्षका बेला विसं. २०६१ सालको जेठ २४ मा तत्कालीन विद्रोही पक्ष माओवादीले गोरखा फुजेलका कृष्णलाई चितवनको रत्ननगर बकुलहरमा गोली हानेर मारेको थियो । कृष्णका आफन्तले प्रहरीमा दिएको उजुरीका आधारमा आइतबारमात्रै चितवन जिल्ला अदालतमा १३ जना विरूद्ध सर्वश्वसहित जन्मकैद माग गरेर मुद्दा दायर भएको छ ।
सुराकीको आरोपमा कृष्णको हत्या गरेको माओवादीले बताउँदै आएको छ । तर मुद्दा लागेका अधिकांश अभियुक्तहरु माओवादीका कार्यकर्ता नभएर फुजेलमा रहेका अधिकारीका छिमेकी, आफन्त र सर्वसाधरणहरु रहेका छन् । नुरप्रसादले व्यक्तिगत रिसका आधारमा आफूहरुविरूद्ध उजुरी दिएको र आफूहरु अनाहकमा फसेको अभियुक्तहरु बताउँछन् ।
घटना भएका बेलमा चितवन माओवादीको जिल्ला सेक्रेटरी यमबहादुर परियार र जिल्ला जनसरकार प्रमुख दण्डपाणि पौडेल थिए । तर प्रहरीले माओवादीका यी जिम्मेवार व्यक्तिलाई एक पटक पनि सोेध्ने र समाउने नगरेको तर घटनासँग सम्बन्धित नरहेका आफूविरूद्ध अभियोग लगाइएको अजिव भनिने परशुराम पौडेलले बताए ।
पौडेल मंसिर २१ मा गिरफ्तार भएका थिए । प्रहरीको हिरासतमा २५ दिन बसेका पौडेलविरूद्ध मुद्दा चलाउन प्रमाण नपुग्ने भन्दै जिल्ला सरकारी वकिलले उनलाई साधारण तारेखमा छोड्न आदेश दिएका थिए । पुस २४ गते हिरासत मुक्त भएयता प्रहरीले उनलाई कुनै सम्पर्क गरेको छैन ।
चैत्र ६ मा समातिएका छविलाल पौडेल अजिवका बाबु हुन् । सो मुद्दामा हाल छविलाल र भिमसेन पौडेलमात्रै प्रहरी हिरासतमा छन् । मुद्दा दायर हुने दिन आइतबार बिहान १० बजे जिल्ला प्रहरी कार्यालयमा बुबाका लागि आफँैले खाना लिएर गएको अजिवले बताए । दिउँसो उनी अदालत पनि पुगेका थिए ।
हिरासतमा रहेका छविलाल र भीमसेनबाहेक अरूलाई फरार भनिएको छ । प्रहरी कार्यालयमा पुगेको मान्छेलाई फरार भनेर मुद्दा दर्ता गरेकोमा अजिव छक्क परेका छन् । कृष्ण अधिकारीको हत्या कसले र किन गरेको हो माओवादीले सवै विवरण सार्वजनिक गर्नुपर्ने अभियुक्तहरुको माग छ ।
अजिबले भने, ‘हामी बेफ्वाकमा जेल जान लाग्यौँ । हत्याराको रुपमा चित्रित हुन थाल्यौँ । मार्ने माओवादी,  जेल जाने हामी । न मैले कहिल्यै बन्दुक बोकँे । न कहिल्यै कृष्णलाई देखेँ । यस्तो बेलामा हामी माओवादीलाई घटनाको सत्य तथ्य के हो । किन मारेको हो, कसले मारेको हो सवै विवरण बाहिर ल्याउन माग गर्दछौँ ।
अधिकारी हत्या अनुसन्धान प्रकरणमा प्रचण्ड बाबुरामले चर्का कुरा गरे पनि चित्त बुझ्दो काम नगरेको अजिवले बताए । आफूहरु जेल जाने अवस्था आउन लाग्दा पार्टीका मान्छेले फोनसमेत उठाउन छाडेको उनले बताए । पारिवारिक झगडामा आफूहरुको पक्ष नलिएको रिसमा नुरप्रसादले आफूहरु विरूद्ध हत्या अभियोगमा उजुरी दिएको अजिवले बताए ।
हत्या अभियोगमा मुद्दा दायर भए पनि पक्राउ नपरेका मेघनाथ पौडेलले नुरप्रसादका माइला बाबा बितेपछि माइली आमालाई अंश दिलाउने सम्बन्धमा भूमिका खेलेकाहरुलाई हत्या आरोपमा उजुरी दिएको बताए । कृष्ण हत्या भएको एक वर्षपछि अंश विवाद निस्केको थियो । नुरप्रसादको उजुरीको आधारमा माइली आमाविरूद्ध पनि मुद्दा दायर भएको छ ।
हत्यालगत्तै कृष्णका बुबा नन्दप्रसादले दिएको उजुरीमा कृष्णलाई तीनजनाले अपहरण गरेर लगेको उल्लेख थियो । घटनाको १८ महिनापछि नुरप्रसादले ११ जनाको नाम किटेर जाहेरी दिएका हुन् । जाहेरीमा नाम नपरे पनि सो घटनामा थप चारजनाको संलग्नता रहेको प्रहरीको अनुसन्धानबाट खुलेको थियो ।
संलग्न चारमध्ये माओवादी छापामार ऋषि लामिछाने र मदन पौडेलको सुरक्षा कारबाहीमा ६२ सालमा निधन भएको प्रहरीको भनाइ छ । हाल बेलायतमा रहेका रूद्र आचार्यको घटनामा संलग्नता रहेको भन्दै प्रहरी अनुसन्धानका आधारमा मुद्दा दायर भएको छ । आचार्य त्यो बेला माओवादी छापामार रहेको प्रहरीको भनाइ छ ।
त्यस्तै, माओवादी नेतृ हिसिला यमीको सहयोगी रहेकी जानुका पौडेलविरूद्ध पनि मुद्दा दायर भएको छ । जानुका र रूद्रबाहेक अरु पार्टीमा सक्रिय नभएको प्रहरी अनुसन्धानबाट खुलेको छ । तर कृष्णका बाबुआमाको लामो अनशन र मानव अधिकारकर्मीको दबाबका कारण आफूविरूद्ध मुद्दा चलेको अभियुक्तहरु बताउँछन् ।
मानव अधिकारकर्मीहरु नन्दप्रसाद, गंगामाया र नुरप्रसादको पक्षमा लागेकाले आफूहरुमाथि भएको अन्याय सुनाउने ठाउँ पनि नपाएको गिरफ्तार भीमसेनकी श्रीमती गोमा पौडेलको गुनासो छ । आइतबार अभियोग दर्ता भए पनि अभियुक्तहरुको थुनछेक सम्बन्धी बहस मंगलबारबाट सुरू हुँदैछ ।