माइक्रोको मनपरीविरूद्ध ट्राफिक प्रहरी

दिपेन्द्र अधिकारी
भरतपुर । आफूखुसी सिट संख्या बढाएका ३८ माइक्रोलाई ट्राफिक प्रहरी चितवनले आवश्यक कारबाहीका लागि यातायात व्यवस्था कार्यालयमा अनुरोध गरेको छ । यातायात व्यवस्था कार्यालयबाट अनुमति लिएको भन्दा बढी सिट जडान गरी यात्रु चढाउन पाइँदैन ।
चैत्र २८ र २९ गते आँपटारीमा भएको चेकजाँचको क्रममा ३८ वटा माइक्रोले अनुमतिभन्दा बढी सिट राखेको पाइएको ट्राफिक प्रहरी चितवनका प्रहरी नायव निरीक्षक रामचन्द्र घिमिरेले बताए । यसअघि पटकपटक चेतावनी दिए पनि अटेर गरेपछि यातायात व्यवस्था कार्यालयमै थप कारबाहीका लागि पठाउने तयारी भएको नायव निरीक्षक घिमिरेले बताए ।
१८ सिट क्षमताको माइक्रोमा सिट थप गरी २४ जनासम्म यात्रु राखेको नायव निरीक्षक घिमिरेको भनाइ छ । उल्टो सिट राखेका ती माइक्रो बसका सिट ट्राफिक प्रहरीले तत्कालै झिकेको थियो । झिकिएका सिटहरु ट्राफिक कार्यालयमा राखिएको छ ।
सिट झिकिएका सवै माइक्रोहरु नारायणगढ काठमाडौं रूटका हुन् । एक हजारसम्मको जरिबाना काट्ने अधिकार ट्राफिकसँग छ । त्यसभन्दा माथि जरिबाना गर्ने अधिकार यातायात व्यवस्था कार्यालयलाई मात्र छ ।
माइक्रोको अगाडिको सिटमा तीन जनासम्म चढाउने र प्रहरीको छड्के जाँचमा खुसुक्क ड्राइभरले पैसा दिने गरेकोमा प्रहरी प्रमुखहरु समक्ष गुनासो पुगेपछि चितवन प्रहरी यससम्बन्धमा जागरूक भएको हो ।
त्यस्तै, ट्राफिक कार्यालय भरतपुरले पश्चिम चितवनको रुटमा चल्ने बसको छतमा यात्रु चढाउने सवारीमाथि पनि कारबाही थालेको छ ।
ट्राफिक प्रहरी कार्यालय भरतपुरका प्रहरी सहायक निरीक्षक कृष्णज्यू ठकुरीले भने, ‘छतमा यात्रु चढाउने र बिना हेल्मेट मोटरसाइकल चलाउनेलाई कारबाही भइरहेको छ ।’ ट्राफिक प्रहरीले हिजो शनिबार गरेको सवारी जाँचबाट पचास हजार राजश्व संकलन गरेको छ ।
एक हप्ताका बीचमा उल्लेखित सवारी कारबाहीबाट २ लाख बढी राजश्व संकलन भएको सहायक निरीक्षक ठकुरीले बताए । ट्राफिक प्रहरीले चैत्र महिनामा मात्रै १० लाख रूपैयाँभन्दा बढी सवारी चेक जाँचबाट राजश्व संकलन गरेको छ ।
त्यस्तै, सवारीको स्वरूप परिवर्तन गर्ने र विद्यालय तथा कलेज पोशाकमै मोटरसाइकल चलाउनेलाई पनि कारबाही गरिरहेको सहायक निरीक्षक ठकुरीको भनाइ छ । भरतपुर नगर क्षेत्रभित्र चल्ने म्याजिक र टेम्पो चालक ३० जना तथा १०० जना यात्रुलाई शुक्रबार क्याम्पसगेटमा जाँच गरी सुरक्षित सवारी यात्राबारे जनचेतनासमेत ट्राफिक प्रहरीले दिएको छ ।
म्याजिक गाडीको ढोकामा परिचालक तथा यात्रु झुण्डिएर यात्रा गर्ने क्रम नरोकिएपछि ट्राफिकले जनचेतना अभियान चलाएको हो । पुनः अटेर गरेमा कडा कारबाही गरिने पनि सहायक निरीक्षक ठकुरीले बताए । चितवनमा पछिल्लो समय ट्राफिक प्रहरीले सवारी जाँच तीव्र पारेको छ ।