रत्ननगर । चितवनका पूर्वक्षेत्रीय शिक्षा उपनिर्देशक रामचन्द्र अधिकारीको बुधबार दिउँसो काठमाडौैँस्थित निवासमा निधन भएको छ ।
चितवन रत्ननगर नगरपालिका १४ डुम्रीचोक पिठुवाका स्थायी बासिन्दा उनको ७८ वर्षको उमेरमा निधन भएको हो । लामो समयदेखि दमका बिरामी रहेका उनी पछिल्लो समयमा काठमाडौँ बस्दै आएका थिए । उनी नेपाल मावि रत्ननगरका पूर्वप्रधानाध्यापक समेत हुन् ।
उनले मनाङ र लमजुङमा जिल्ला शिक्षा अधिकारी भएर नेपालको शिक्षा क्षेत्रमा ठूलो योगदान दिएका थिए । उनी २०२८ सालमा तत्कालीन सरकारले लागू गरेको नयाँ शिक्षा ऐनको विरोध गर्ने क्रमममा नौ महिना जेल परेका थिए ।
उनको पार्थिव शरीरमा नेपाली कांग्रेस चितवनका सभापति जीतनारायण श्रेष्ठ, पूर्व जिल्ला सभापति टीकाराम न्यौपाने, पूर्वसांसद् एकनाथ भाट र नेपाली कांग्रेस रत्ननगरका सभापति रुपनराज घिमिरेले संयुक्तरुपमा कांग्रेसको झन्डा ओढाएका थिए ।
उनकी छोरी ज्योत्सना ढकाल भरतपुर महानगरपालिका १८ को वडा सदस्य छिन् भने जेठी बुहारी रीता अधिकारी नेपाल महिला संघ चितवनको जिल्ला कोषाध्यक्ष छिन् ।
उनका दुवै छोराहरु हरिषचन्द्र र विप्लवचन्द्र अधिकारी नेपाल विद्यार्थी संघ चितवनका पूर्वविद्यार्थी नेता हुन् । उनको देवघाटमा अन्त्येष्टि गरिएको छ ।
