प्रशासनमै हुलाक टिकट

भरतपुर । जिल्ला हुलाक कार्यालय चितवनले जिल्ला प्रशासन कार्यालयमा आफ्नै कर्मचारीको व्यवस्था गरेर हुलाक टिकट बिक्री सुरु गरेको छ । जिल्ला प्रशासन कार्यालय चितवन वरपरका पसलहरुमा टिकटको मूल्य बढी लिइ सर्वसाधरण ठगिएको गुनासो आएपछि प्रशासन कार्यालयमै हुलाक टिकटको व्यवस्था गरिएको हो ।
‘हुलाक कार्यालयबाटै टिकट लिएर आउँछन् अनि बिक्री गरेर कर्मचारी फर्किन्छन्’, सहायक प्रमुख जिल्ला अधिकारी शिवराम गेलालले भने, ‘बाहिर जथाभावी मूल्य लिएको गुनासो आएपछि हुलाककै कर्मचारी राखेर टिकट बिक्री सुरु गरिएको हो ।’
सरकारी कार्यालयमा पेस हुने निवेदनदेखि नागरिकता तथा राहदानीका लागि निवेदनमा समेत हुलाक टिकट टाँस्नुपर्ने अनिवार्य व्यवस्था छ । १० रुपैयाँ पर्ने हुलाक टिकटलाई १३ देखि १५ रुपैयाँसम्म बाहिर पसलमा लिने गरिएपछि हुलाक आफैले बिक्री गर्ने भएको हो । – दृढ संकल्प पोख्रेल (प्रशिक्षार्थी)