भरतपुर । चितवनमा ५०६ जना एचआईभी संक्रमितहरु एआरटी सेवाको पहुँचमा पुगेका छन् । उक्त औषधीले रोग प्रतिरोधात्मक क्षमता बढाउने गर्छ । कुल यहाँ रहेका एक हजार ३० एचआईभी संक्रमितमध्ये ५०६ जनाले सेवा लिईरहेको जिल्ला एड्स समन्वय समिति चितवनका संयोजक रामहरि न्यौपानेले बताए ।
कुल सेवामा आएका ७१९ मध्ये अहिले ५०६ जनाले भरतपुर अस्पतालबाट नियमित सेवा लिइरहेको न्यौपानेले बताउनुभयो । जसमा २३६ पुरूष र २२६ महिला संक्रमित रहेका छन् । बाँकी तेस्रो लिंगी र बालबालिकाहरु रहेको न्यौपानेले जानकारी दिए ।
सेवा लिइरहेकामध्ये केहीको मृत्यु भएको र केही अन्य जिल्लामा रिफर गरिएको उहाँले बताउनुभयो । सेवा लिने क्रम बढिरहेको उनले बताए । पछिल्लो समयमा चेतनामा वृद्धि भएकाले संक्रमितहरु खुलेर आउन थालेको जिल्ला एड्स समन्वय समिति चितवनले जनाएको छ ।
चितवनमा ४५ जना बालबालिकाहरु संक्रमित रहेको तथ्याङ्क जिविससँग छ । यस वर्षदेखि स्वास्थ्य, शिक्षा र पोषणका लागि बालबालिकाहरुलाई मासिक १ हजारका दरले भत्ता दिने प्रक्रिया समेत सुरू भएको हो । सामाजिक संरक्षण अनुदान कार्यक्रममार्फत उनीहरुले भत्ता पाउने भएका हुन् । नेपाल सरकार स्वास्थ्य मन्त्रालयले एचआईभी संक्रमित बालबालिकाका लागि सामाजिक संरक्षण अनुदान सञ्चालन कार्यविधि लागु गरेको छ ।
ग्लोबल फण्डको सहयोगमा सेभ द चिल्ड्रेनमार्फत कार्यक्रम ल्याइएको न्यौपानेले बताउनुभयो । नेपालका ४८ जिल्लामा रहेका संक्रमित बालबालिकाहरुलाई यही वैशाखबाटै भत्ता दिने तयारी गरिएको एड्स समन्वय समिति चितवनका संयोजक रामहरि न्यौपानेले बताए ।
Discussion about this post