धार्मिक महामहोत्सवको तयारी तीव्र

नारायणगढ । चितवनको नारायणी नदि किनारमा बैशाख ७ गतेदेखि सुरु हुने श्रीमद्भागवत विश्वजागरण शालग्राम धार्मिक महामहोत्सवको तयारी तीव्र पारिएको छ । धार्मिक महामहोत्सवलाई सफल पार्न देशका विभिन्न  ५० स्थानमा समितिहरु गठन गरिएको धार्मिक महामहोत्सव मूल आयोजक समितिका संयोजक ऋषिराज पाण्डेले बताए ।
चितवन, नवलपरासी, रुपन्देही, कास्की, काठमाडौँलगायत जिल्लामा गठित विभिन्न समितिहरुले प्रचारात्मक कामलाई तीव्रता दिएको पाण्डेले बताए । धार्मिक महामहोत्सव हुने स्थान नारायणी नदि किनारलाई सम्याउने र सफा पार्ने काम सम्पन्न भइसकेको उनले जानकारी दिए । महोत्सवलाई सफल बनाउन भरतपुर, गैँडाकोट, कावासोती,  मेघौलीलगायतका स्थानमा स्थानीय स्तरमा अन्तक्र्रिया सम्पन्न भएको श्रीमद्भागवत विश्वजागरण शालग्राम धार्मिक महामहोत्सवका संरक्षक एवम् प्रमुखवाचक ईश्वरकृष्ण महाराजजीले बताए ।
धार्मिक महोत्सवकै विषयमा बुधबार पोखरामा अन्तक्र्रिया कार्यक्रम आयोजना गरिएको छ । सो अन्तक्र्रियामा सहभागी हुन  ईश्वरकृष्ण महाराजजीसहितको टोली पोखरा पुगेको छ । धार्मिक महोत्सवका आउने भक्तजनहरुको स्वागतका लागि आर्कषक स्वागतद्धार निर्माणको तयारी भएको छ । विभिन्न १५ स्थानमा स्वागतद्धार निर्माण गरिन लागेको आयोजकले जनाएको छ ।
धार्मिक महामहोत्सवको चर्चित भारतीय टेलिभिजन आस्था र नेपालको कान्तिपुर टेलिभिजनले प्रत्यक्ष प्रशारण गर्नेछन् ।