तालिमबाट उपभोक्ता लाभान्वित

नारायणगढ । भरतपुर–२ आँपटारीमा अवस्थित जलदेवी सामुदायिक वन उपभोक्ता समूहले सञ्चालन गरेको सीपमूलक तालिमले उपभोक्ता लाभान्वित भएका छन् । वन समूहले अहिले महिला उपभोक्तालाई लक्षित गरी कुशन निर्माण तालिम सञ्चालन गरिरहेको छ । चैत १६ गतेबाट वैशाख १ गतेसम्म आयोजित तालिममा वन समूहका २२ जना महिला उपभोक्ताले सहभागिता जनाएका छन् ।
उनीहरुलाई निःशुल्क तालिमको व्यवस्था गरिएको जलदेवी सामुदायिक वन उपभोक्ता समूहका अध्यक्ष पूर्णबहादुर श्रेष्ठले जानकारी दिए । तालिमले उपभोक्ताहरुलाई आत्मनिर्भर गराई जीविकोपार्जनमा सहजता मिल्ने अध्यक्ष श्रेष्ठले विश्वास व्यक्त गरे ।
वन समूहले सिलाई कटाई, बिरगेड निर्माण, वन व्यवस्थापन तालिम पनि यसअघि उपभोक्ताका माझमा सञ्चालन गरिसकेको जनाउँदै अध्यक्ष श्रेष्ठले उपभोक्ता आत्मनिर्भर बनेपछि वन संरक्षणमा समेत सघाउ पुगेको अनुभव सुनाए ।
वन समूहकी उपाध्यक्ष सुकमाया भुजेलले वनमा घाँस दाउरा गर्न महिलाहरु नै बढी मात्रामा भेटिएकाले उनीहरुलाई सीपमूलक तालिम प्रदान गरेपछि त्यसमा कमी आई संरक्षणमा सहयोग पुगेको बताए । तालिम अत्यन्त जीवन उपयोगी एवम् आयआर्जनमा सहयोगी हुने सहभागीहरुको भनाइ थियो ।
जलदेवी सामुदायिक वन उपभोक्ता समूहले उपभोक्ताहरुलाई तालिमका साथै विपन्न परिवारका बालबालिकालाई विद्यालयमा छात्रवृत्तिसमेत उपलब्ध गराउँदै आएको छ । हाल भरतपुरका विभिन्न विद्यालयमा अध्ययनरत १८ जना बालबालिकालाई छात्रवृत्ति दिइएको वन समूहका सचिव केशवबहादुर थापाले जानकारी दिए ।
४४८ हेक्टर क्षेत्रफलमा फैलिएको यस सामुदायिक वनमा करिव ११ सय उपभोक्ता रहेको वन समूहका सदस्य भोजराज देवकोटाले जानकारी दिए । सोही वन क्षेत्रभित्रै विभिन्न समुदायको अन्तिम संस्कार गर्ने स्थान बनाइएको र भरतपुरका वेवारिसे शवहरुलाई पनि त्यही गाड्ने गरिएकोमा भने स्थानीय उपभोक्ताले गुनासो गर्दै स्थानान्तरण गर्नुपर्ने जनाएका छन् ।