हत्या आरोपीले पोलिग्राफ परीक्षण गर्न मानेनन्

–चितवन प्रहरीलाई पहिलो गाँसमै ढुङ्गा–

–दिपेन्द्र अधिकारी

भरतपुर । अभियुक्तले बयानको क्रममा झुठो बोलेको नबोलेको बारेमा पत्ता लगाउने पोलिग्राफ मेसिनको प्रयोग चितवनमा यसै साता प्रयोग गर्न खोजिएको थियो । तर, चितवन प्रहरी पहिलो पटक नै असफल भएको छ ।
कृष्ण अधिकारी हत्या प्रकरणमा अभियुक्तका रुपमा हाल चितवन प्रहरी हिरासतमा रहेका छविलाल पौडेल र भीमसेन पौडेलले प्रविधिमा आधारित यस्तो मेसिनमा बस्न अस्वीकार गरेपछि प्रहरीको पहिलो प्रयास र अनुभव खेर गएको छ । यससँगै विश्वासनीयता निर्धारण गर्ने विज्ञानका रुपमा लिइएको पोलिग्राफ परीक्षण प्रणाली नै अन्यौलमा परेको छ । मानवअधिकारको दृष्टिकोणबाट हेर्दा कुनै पनि व्यक्तिले बयान दिनका लागि अस्वीकार गर्ने अधिकार छ । जवरर्जस्ती बयान लिन पाइँदैन । मेसिनलाई शरीरका विभिन्न भागमा बाँधिएर राखिन्छ । बोलीको तरङ्ग कम्प्युटरमा देखिन्छ ।
चितवन प्रहरीले उल्लेखित दुई अभियुक्तबाट घटनाबारे सत्य–तथ्य बुझ्न पोलिग्राफ मेसिनसहित यससम्बन्धी तालिम लिएका एक प्रहरी निरीक्षक काठमाडौँबाट आएका थिए । प्रहरी स्रोतका अनुसार अभियुक्त पक्षका वकिलहरुको सल्लाहबाट अभियुक्तले पोलिग्राफ परीक्षण गर्न अस्वीकार गरेको थाहा भएको छ ।
घटनामा आफूहरुको कुनै संलग्नता नभएको जिकिर गर्दै आए पनि अभियुक्तले किन पोलिग्राफ परीक्षण गर्न अस्वीकार गरे भन्नेबारे बहस सुरु भएको छ । जानकारहरुका अनुसार सम्बन्धित व्यक्ति अपराधमा संलग्न भए–नभएकोबारे पत्ता लगाउन कम्तीमा पनि २ घण्टा लाग्छ ।
मौखिक बयानका क्रममा सत्य र झुटो पत्ता लगाउन नसक्ने भएपछि नेपाल प्रहरीले पोलिग्राफ मेसिन तीन महिनाअघि मात्रै प्रयोगमा ल्याएको थियो । यी अभियुक्तहरुलाई भेट्न पूर्वप्रधानमन्त्री डा. बाबुराम भट्टराई यसै हप्तामात्रै चितवन आएका थिए ।
यो मेसिन चलाउनका लागि चितवनबाट समेत एक प्रहरी नायव निरीक्षक तालिममा खटिएका थिए । जहाँ नेपालभरका १० प्रहरी सहभागी थिए ।
५ जनाको ज्यान जाने गरी भएको जनकपुर बम काण्डमा सभासद सञ्जय शाहको संलग्नता यसै मेसिनको परीक्षणबाट खुलेको थियो । अपराध अनुसन्धानमा मेसिनको प्रयोग बरदान सावित भए पनि अभियुक्तले परीक्षण ईन्कार गरेमा यसको कुनै मह¤व रहँदैन ।
गत मंगलबार १३ दिनको म्याद थप गरी प्रहरीले बाँकी अनुसन्धान अघि बढाइरहेको डीएसपी सञ्जय राउतले बताए । यसै घटनामा संलग्न रहेको आरोपमा यस अघि पक्राउ गरिएका छविलालका छोरा अजिव भनिने पर्शुराम पौडेल र रामप्रसाद अधिकारी अभियोग पुष्टि नभएपछि छुटिसकेका छन् ।
कृष्णका दाजु नुरप्रसादको जाहेरीमा दर्जन बढी अभियुक्तहरुलाई चितवन प्रहरीले पटक–पटक पक्रँदै, अनुसन्धान गर्दै आएको छ । सरकारी वकिल कार्यालयले प्रमाण नपुगेको भनी अभियुक्तहरुलाई छोड्दै आएको छ । कृष्णको नौ वर्षअघि बकुलहर चोकमा हत्या भएको थियो । हत्याको सम्बन्धमा कोही कसैसँग जानकारी भएमा सूचना दिन चितवन प्रहरीले सबैमा अनुरोध गरेको छ ।