नारायणगढ । मापदण्डबिपरीत संचालनमा आएका नवलपरासी जिल्लामा रहेका क्रसर उद्योगहरु बन्द भएका छन् । मापदण्डबिपरीतका क्रसर उद्योगहरुमा चितवन राष्ट्रिय निकुञ्जले ताला लगाई दिएपछि ती उद्योगहरु बन्द भएका हुन् । क्रसर उद्योगहरु बन्द हुने क्रम बढेको छ ।
जिल्लामा रहेका क्रसर उद्योगमध्ये कालिका क्रसर उद्योग, नवलपुर क्रसर उद्योग, क्रिशक्ति क्रसर उद्योग र महालक्ष्मी क्रसर उद्योगमा चितवन राष्ट्रिय निकुन्जले तालाबन्दी गरेको थियो । नवलपरासीका बाँकी सात क्रसर उद्योग पनि बन्द गर्न स्थानीय प्रशासनले अल्टिमेटमसमेत दिएको छ ।
सरकारी मापदण्डबिपरित भएको भन्दै जिल्लामा रहेका ११ मध्ये चारवटा क्रसर उद्योगहरु चितवन राष्ट्रिय निकुन्जले एक्कासी बन्द गराएपछि क्रसर व्यवसायीहरु रूष्ट भएका छन् ।
क्रसर उद्योगहरु गाउँबाट पाँच सय मिटर टाढा, राजमार्ग छेउछाउमा हुन नहुने, निकुन्जभित्र हुन नहुने लगायतका थुप्रै मापदण्ड पूरा गर्नुपर्ने तर यस्ता मापदण्ड कसैले पनि पूरा नगरेका कारण सबै क्रसर उद्योग बन्द गराएरै छोड्ने जिल्ला प्रशासनले जनाएको छ ।
निकुञ्जभित्र रहेका चार क्रसर उद्योग बन्द भए पछि आन्दोलित व्यवसायीहरु सरकारले असार मसान्तसम्म संचालन गर्न र त्यसपछि मापदण्ड पूरा गरेर संचालन गर्न समय दिए पनि चितवन राष्ट्रिय निकुञ्जले सहमतिबिपरीत एक्कासी क्रसर उद्योगमा तालाबन्दी गरेको नवलपुर क्रसर उद्योगका सञ्चालक संजयगोविन्द श्रेष्ठले बताउनुभयो ।
सरकारसँग भएको सहमतिबिपरीत क्रसर उद्योग बन्द गरेपछि आन्दोलित भएका क्रसर संचालकहरुले तत्काल असार मसान्तसम्म संचालन गर्न पाउनु पर्ने माग राखेका छन् ।
पूर्वसहमति अनुसार असार मसान्तपछि भने अन्यत्र सार्ने गरी काम अगाडि बढाइएको संचालक निर्मल क्षेत्रीले बताए । क्रसर उद्योग बन्द भएपछि नवलपरासी, चितवनलगायतका जिल्लामा घर, विद्यालय, संघ संस्था, अस्पताललगायतका भवन निर्माण पूर्णरूपले प्रभावित भएका छन् ।
नवलपरासीमा रहेका क्रसर उद्योगहरु बन्द हुने क्रम बढेपछि निर्माणका काम प्रभावित हुन थालेको र यसले धेरै प्रभाव पार्ने उपभोक्ताहरुले जनाएका छन् । वन तथा भूसंरक्षण मन्त्रालयसँग भएको सहमतिमा क्रसर उद्योग मापदण्ड बिपरीत भए पनि असार मसान्तभित्र अन्यत्र सार्ने सहमति भएको थियो । सो समयसम्म संचालन गर्न दिइने उल्लेख भए पनि चितवन राष्ट्रिय निकुञ्जले सहमतिको उल्लंघन गरी क्रसर उद्योग बन्द गराएपछि क्रसर व्यवसायीहरु आन्दोलन केन्द्रित भएका छन् ।
Discussion about this post