खडेबाबा उभ्याएपछि भर्ना कटौती !

दिपेन्द्र अधिकारी
भरतपुर । पुरानो मेडिकल कलेजको विद्यार्थी भर्ना कोटा कटौती गरिएको छ । भाडाका प्राध्यापक (खडेबाबा) उभ्याएर चिकित्सा शास्त्रमा स्नातकोत्तर र डाक्टर अफ मेडिसिनमा विद्यार्थी पढाउँदै आएको भरतपुरको कलेज अफ मेडिकल साइन्सेस शिक्षण अस्पताल (पुरानो मेडिकल) को विद्यार्थी भर्ना कोटामा कटौती भएको हो ।
काठमाडाँै विश्वविद्यालय र नेपाल मेडिकल काउन्सिलले कलेजको अनुगमन गरेको थियो । कलेजले अनुगमनका समयमा सौराहा र जिल्लाका अन्य ठूला होटलमा ती भाडाका प्राध्यापकलाई राख्ने गरेको पाइएको छ ।
यसअघि पनि कलेजको अनुगमन हुने गरे पनि त्यो देखावटीमात्र रहेको थियो । कलेजको आर्थिक प्रलोभनमा परेर अनुगमन कार्यान्वयन प्रभावित हुँदै आएको थियो ।
काठमाडाँै विश्वविद्यालय र नेपाल मेडिकल काउन्सिलको अनुगमनका क्रममा भारतबाट भाडामा प्राध्यापकहरु ल्याएर देखाउने गरेको भन्दै कलेजविरूद्ध यसअघि उजुरी परेको थियो । चिकित्सा शास्त्रमा स्नातकोत्तर र डाक्टर अफ मेडिसिन पढाउनका लागि एक विद्यार्थीका लागि एकजना प्राध्यापक वा सहायक प्राध्यापक पूर्णकालीन हुनुपर्ने प्रावधान छ । तर विद्यार्थीको अनुपातमा प्राध्यापक नदेखिएपछि कलेजको विद्यार्थी कोटा घटाइएको हो ।
कलेजमा अध्यापन गराइरहेका प्राध्यापकहरुले नै कुनै पनि विभागमा आवश्यक मात्रामा प्राध्यापक नरहेको जानकारी दिएका छन् । मास्टर अफ मेडिसिनमा विशेष विशेषज्ञता (सुपर स्पेसलाइजेसन) हासिल गरेका प्राध्यापक र सहप्राध्यापक आवश्यक हुन्छ । ती प्राध्यापकका लागि धेरै तलब दिनुपर्ने भएकाले कलेजले अनुगमनकर्तालाई आर्थिक प्रलोभनमा पारी पटकपटक छुटकारा पाएको थियो ।
पछिल्लो समय काठमाडाँै विश्वविद्यालयले गरेको अनुगमनका क्रममा सो मेडिकल कलेजले भाडाका प्राध्यापक उभ्याएको पाइएपछि विश्वविद्यालयले यसअघि दुवै तहमा दिएको कोटामा कटौती गरेको बताएको छ । कलेज अफ मेडिकल साइन्सेसले गतवर्ष १९ विषयमा चिकित्सा शास्त्रमा स्नातकोत्तर तह पढाउने अनुमति पाएको थियो । जसमा ४४ जना विद्यार्थी भर्ना भएका थिए ।
मेडिकल कलेजहरुको विश्वविद्यालयले अनुगमन गरेपछि नेपाल मेडिकल काउन्सिलले अनुगमन गर्दछ । काठमाडाँै विश्वविद्यालयको स्कुल अफ मेडिकल साइन्सेसका मेनेजर दीपक दाहालका अनुसार काउन्सिलले सामान्यतया, विश्वविद्यालयले पठाएको कोटालाई बढाउँदैन । विश्वविद्यालयले काउन्सिलमा अनुगमनका लागि पठाएकाले घटाएको कोटा गोप्य राखिएको छ ।
चिकित्साशास्त्रमा स्नातकोत्तरका लागि २२ लाख ५० हजार रूपैयाँ र डाक्टरअफ मेडिसिनका लागि २५ लाख रूपैयाँभन्दा बढी लिन नपाउने गरी शुल्क तोकिए पनि यस मेडिकल कलेजले एमबीबीएस भर्नामा ५५ लाख रूपैयाँसम्म लिएको पाइएको छ ।