नारायणगढ । आन्तरिक पर्यटक खोज्दै देश दौडाहामा निस्किएका पोखराका होटल व्यवसायीहरूले चितवनबाट पर्यटन प्रवद्र्धनको अभियान सुरू गरेका छन् ।
देश दौडाहामा निस्किएको पोखराको पृथ्वी होटल व्यवसायी सङ्घका पदाधिकारीहरूले आइतबार चितवनका होटल व्यवसायीसँग छलफलसमेत गरेका छन् । उनीहरूले पोखराको पर्यटकीय स्थलको जानकारी दिँदै चितवनका महत्वपूर्ण पर्यटकीय गन्तव्यको स्थलगत अवलोकनसमेत गरेका छन् ।
पूर्वीनेपालको भ्रमणमा निस्किएको १४ सदस्यीय टोलीले आइतबार चितवनमा व्यवसायीसँग आन्तरिक पर्यटन प्रवद्र्धनको बारेमा छलफल गरेको चितवनका होटल व्यवसायी दिनेशकुमार चुकेले बताउनुभयो । पोखरा नेपालकै दोस्रो पर्यटकीय गन्तव्यस्थल हो भने चितवन तेस्रो गन्तव्य हो ।
अहिलेसम्म यहाँका व्यवसायी बाह्य पर्यटन प्रवद्र्धनमा लागेका थिए । यसपटक भने आन्तरिक पर्यटन प्रवद्र्धन गर्न देश दौडाहामा निस्किएको पोखराको पृथ्वी होटल व्यवसायी सङ्घका अध्यक्ष रिजन शेरचनले बताउनुभयो । चितवनसँगै हेटौँडामा समेत छलफल गर्ने कार्यक्रम रहेको उहाँले बताउनुभयो ।
पूर्वीनेपालको पाँचदिने भ्रमणमा बारा, पर्सा, विराटनगर हुँदै काँकडभिट्टा तथा पशुपतिनगरसम्म पुगेर आन्तरिक पर्यटक प्रवद्र्धनका विषयमा छलफल गर्ने शेरचनले बताउनुभयो ।
चितवनमा भएको छलफलमा होटल व्यवसायी समिति चितवनका अध्यक्ष इमान्दु बरालले दुई क्षेत्रको पर्यटन प्रवद्र्धनमा यस्ताखाले भ्रमण फलदायी हुने बताउनुभयो ।
हाल ५० प्रतिशतभन्दा बढी पर्यटन क्षेत्र आन्तरिक पर्यटकले ढाकेका छन् । बाह्य पर्यटकभन्दा आन्तरिक पर्यटक आम्दानीको स्रोतसमेत भएकाले अब भित्रैका पर्यटकलाई लोभ्याउने कार्यक्रम आवश्यक भएको व्यवसायीहरूले बताएका छन् । यसअघि पोखराका पर्यटन व्यवसायीहरूले भारतलगायत विभिन्न क्षेत्रमा पर्यटन प्रवद्र्धनका कार्यक्रम गर्दै आएका थिए ।
पोखरा विशेषगरी फेवालगायत विभिन्न ताल, प्याराग्लाइडिङ, हिममशृङ्खलाको दृष्यावलोकन, गुफा तथा पातले छाँगोलगायत क्षेत्रको अवलोकनका लागि पर्यटक लोभिने गरेका छन् भने चितवन वन्यजन्तु अवलोकन र हात्ती सफारीमा प्रख्यात रहेको छ ।
Discussion about this post