नारायणगढ । काठमाडौँबाट विराटनगरतर्फ जाँदै गरेको बा १ ज ३९९० नम्बरको ट्याक्सी शनिबार राति मकवानपुरको सिस्नेरी गाविस–३ माल्टाडाँडामा दुर्घटना हुँदा दुई परिवारका छ जनाको घटनास्थलमै मृत्यु भएको छ ।
मृत्यु हुनेमा मोरङको बेलिया गाविस–३ बस्ने वर्ष ३६ की दुर्गा पौडेल, निजका ११ वर्षका छोरा पराञ्जल पौडेल र तीन वर्षकी छोरी पराञ्जलि पौडेल तथा काठमाडौँ बस्दै आएकी वर्ष २६ की कुसुम विष्ट, निजको १० वर्षका छोरा उद्धव विष्ट र चार महिनाकी छोरी रहेको जिल्ला प्रहरी कार्यालय मकवानपुरले जनाएको छ ।
मृतक दुर्गा पौडेलका पति ट्याक्सी चालक यज्ञ पौडेल गम्भीर घाइते भएका र उनलाई काठमाडौँको वीर अस्पतालमा पठाइएको जिल्ला प्रहरी कार्यालयले जनाएको छ । उक्त ट्याक्सी सडकबाट करिब ५० फिट तल खसेको थियो ।
त्यस्तै, काठमाडौँबाट सर्लाहीको मलङ्गवातर्फ जान गइरहेको ना ३ ख ८११७ नम्बरको यात्रुवाहक बस र हेटौँडाबाट चितवनतर्फ जाँदै गरेको ना३ख ५०७८ नम्बरको ट्रिपर हेटौँडा–नारायणगढ सडक खण्डको चुनाचुरीमा ठक्किँदा बसमा सवार एक यात्रुको मृत्यु भएको छ । जिल्ला प्रहरी कार्यालय मकवानपुरका अनुसार मृत्यु हुने युवक १५÷१६ वर्षको जस्तो देखिए पनि निजको सनाखत भएको छैन ।
Discussion about this post