निर्वाचनमा महिला एकजुट हुने

भरतपुर । आगामी मध्यवती निर्वाचनमा महिला सहभागिताको विषयमा महिलाहरु एकजुट भएर लाग्ने प्रण गरेका छन् । वर्षाैदेखि  परम्परागत रुपमा पछाडि पारिएका महिलाको सहभागिता ज्यादै न्यून रहेको भन्दै आक्रोश पोखेका थिए । महिला अगुवाहरु सीता तिमल्सेना, गंगा भण्डारी तथा पार्वती विकले महिला अधिकारको विषयमा बोलेका थिए ।
कालिका सामुदायिक महिला विकास केन्द्र तथा मध्यवर्ती क्षेत्र महिला अधिकार मञ्च चितवनको संयुक्त आयोजनामा शुक्रनगरमा भएको मध्यवर्ती क्षेत्रमा रहेका उपभोक्ता समूह पुर्नगठन तथा नीतिगत अभियानका लागि ५ दिने एक्टिभिष्ट तालिमको समापनमा बोल्ने महिलाहरुले यस्तो बताएका हुन् ।
केयर नेपालको सहयोग तथा प्रभात किरण सेवा समाजको सहकार्यमा सम्पन्न कार्यक्रममा कालिका सामुदायिक महिला विकास केन्द्र माडीका कार्यक्रम संयोजक कृष्ण पन्तले महिलाहरुको प्रतिनिधित्व मध्यवर्तीको निर्वाचनमा सुनिष्चित हुनुपर्नेमा जोड दिएका थिए ।
नेपाल पत्रकार महासंघ चितवनका सचिव कृष्णचन्द्र भट्टराईले कर्मचारीमुखी संरक्षण पद्धतिका कारण निकुञ्जको संरक्षण दिगो र व्यवहारिक हुन नसक्ने बताए । कार्यक्रममा कालिका सामुदायिक महिला बिकास केन्द्रकी सचिना गुरूङले महिलाको क्षमता अभिवृद्धिका लागि संस्थाले धेरै कार्यक्रम गरेको जानकारी दिँदै मध्यवर्तीमा महिलाको प्रतिनिधित्व हुनुपर्नेमा जोड दिएकी छन् ।
प्रभात किरण सेवा समाज चितवनका अध्यक्ष छविलाल न्यौपानेले नागरिकलाई विभिन्न बहानामा निकुञ्जले दुःख दिए पनि संरक्षणमा जनता सधँै लागेको बताए । कार्यक्रमका प्रमुख अतिथि जगतपुर गाविसका अध्यक्ष विष्णुप्रसाद भुसालले मध्यवर्तीको संरचनामा बजेट पारदर्शीता र समूहका अध्यक्ष सचिवको प्रत्यक्ष सम्लग्नताका साथै बजेट तथा कार्यका लागि समूहलाई नै जिम्मेवारी दिइनुपर्ने बताए । कार्यक्रम मध्यवर्ती क्षेत्र महिला अधिकार मञ्च चितवनकी अध्यक्ष इन्दिरा बोटेको अध्यक्षतामा सम्पन्न भएको थियो ।